LDK ishte më aktive dhe më e organizuar gjatë viteve 90-ta

Gjilan – Anton Quni deputet në Kuvendin e Kosovës, njëherësh ish shef i shtabit operativ në brigadën 138 “Agim Ramadani”, ka thënë se roli i mërgatës sonë në mbështetjen e luftës çlirimtare ishte i madh.

“Roli i mërgimtarëve në themelimin e Ushtrisë së Kosovës”.Kjo ka qenë tema që dega e LDK-së ka mbajtur të enjten ku edhe u vlerësua roli i mërgimtarëve në çlirimin e Kosovës dhe shtetformimin.

Kreu i LDK-së së Gjilanit Lutfi Haziri ka folur për rolin e madh që ka pasur mërgata jonë në të gjitha periudhat, duke përfshirë veçmas periudhën e luftës çlirimtare, rolin e madh që pati mërgata në themelimin e Ushtrisë së Kosovës, por edhe roli i saj i madh tani në ndërtimin e vendit

Kurse,Anton Quni deputet në Kuvendin e Kosovës, njëherësh ish shef i shtabit operativ në brigadën 138 “Agim Ramadani”, ka thënë se roli i mërgatës sonë në mbështetjen e luftës çlirimtare ishte i madh.

Quni tha se përkundër identifikimit të palëve në luftë si formacione ushtarake, policore, guerile etj, mërgata është pjesë aktive e ndikimit të drejtpërdrejtë në profilizimin, zhvillimin, performancën dhe suksesin e këtyre formacioneve.

Quni tha se mërgata po ashtu luan rolin e saj si aktere e parapërgatitjeve për luftë, ndikuese e fuqishme në kohëzgjatjen e luftimeve dhe një ndër protagonistët kryesor në sanimin e gjendjes pas përfundimit të luftës.

Sipas Qunit, mërgata e organizuar në subjekte politike, shoqata humanitare, kulturore etj, do të qëndrojë karshi kërkesave dhe nevojave për mbështetjen e formacioneve luftarake që nga fillimi i viteve të 90-ta kur ato vepronin si grupe guerile e deri te formacionet taktiko-operative të UÇK-së të komanduara nga Shtabi i Përgjithshëm dhe formacionet e UÇK-së si pjesë e FARK, nën organizimi ne ministrisë së Mbrojtjes së Republikës së Kosovës.

Quni tha se në vitet e 90-ta organizimi më masovik, më i strukturuari, më aktiv, ku mërgata e kulmojë tërë energjinë e potencialin, ishte LDK-ja. Sipas tij, duke iu referuar Kushtetutës së Republikës së Kosovës , programit politik të saj, në rrethana të reja të luftës, presidentin e Republikës Dr Ibrahimi Rugovën e mbështeti për komandant suprem të FARK-ut.

“Duke iu përgjigjur urdhrit të prerë se obligim i çdo qytetari është ta mbrojë pragun e shtëpisë, dhe duke iu përgjigjur kushtrimit të komandantit legjendar Adem Jasharit, nga mërgata shqiptare në funksion të luftës u vunë të gjitha mundësitë politike, ushtarake, financiare, morale…”, ka thënë Quni.

Ai tha se edhe tani pas çlirimit të vendit, mërgata ka rolin e saj në demokratizimin e vendit, forcimin e institucioneve, sundimin e ligjit, përmirësimin e mirëqenies së qytetarëve, e të tjera./rajonipress/