LDK e shqetësuar për mirëmbajtjen dimërore të rrugëve në fshatra

Gjilan – Vlerësojmë se është një papërgjegjësi që deri në këtë kohë nuk është rregulluar çështja e mirëmbajtjes dimërore e rrugëve thotë Arben Mehmeti nga LDK-ja.

Shefi i LDK-së Arben Mehmeti me një letër zyrtare ka kërkuar nga Qemajl Mustafa dhe Hatixhe Daku informacione zyrtare rreth tenderit të mirëmbajtjes dimërore të rrugëve, meqë sipas tij tashmë në shumë rrugë të qytetit dhe kryesisht të fshatrave ka pengesa të shumta në qarkullim.

“Deri më tani kjo çështje ka qenë dashtë të rregullohet përmes tenderit publik dhe kjo vonesë nuk duhet të ketë asnjë justifikim sepse në këtë formë pësojnë qytetarët e komunës së Gjilanit në masë të madhe dhe se komuna dhe zyrtarët komunal do të duhej të japin llogari në lidhje me mos ushtrim adekuatë të përgjegjësive konformë kohës” ka shkruar Mehmeti.

Mehmeti mendon se kjo është një papërgjegjësi që deri në këtë kohë nuk është rregulluar çështja e mirëmbajtjes dimërore e rrugëve.

“Ne kemi marrë shumë shqetësime nga disa lokacione në qytet dhe fshatra prandaj dëshirojmë që urgjentisht të na njoftoni në lidhje me këtë problem. Ne kërkojmë që të ketë një mobilizim maksimal të institucioneve komunale dhe të përdorni të gjithë mekanizmin institucional me qëllim që në mënyrën më të mirë të ndihmohet qarkullimi i papenguar në këtë drejtim në të gjitha lokacionet e komunës dhe se situata është e papërballueshme për shumë qytetarë kryesisht nëpër disa fshatra malore” ka thënë Mehmeti.

Madje Mehmeti ka kërkuar që një ditë para seancës së Kuvendit Komunal të ofrohet një informatë me shkrimë sa i përket këtij problemi./rajonipress/

Shpërndaje.
© RAJONIPRESS