LDK e AAK kritikojnë Qeverinë për degradim të kulturës e arsimit

Partitë opozitare, Lidhja Demokratikë e Kosovës dhe Aleanca për Ardhmërinë e Kosovës, kanë kritikuar Qeverinë e Kosovës, për mosefikasitet dhe degradim në fushën e kulturës dhe arsimit. Në konferencat e sotme për media, këto dy subjekte thanë se moszabtimti i legjislacionit dhe politizimi i skajshëm janë vetëm disa nga pikat e dobëta që kanë shënuar 2012, në fushat e fokusura.

Këshilli i Ekspertëve për Kulturë, Rini dhe Sport i LDK-ës, ka kritikuar Ministrinë e Kulturës, përkatësisht ministrin, Memli Krasniqi, për shkelje ligjore, degradimi dhe improvizimi të jetës kulturore në vend si dhe politizim të sportit, gjatë vitit 2012.

E në anën tjetër edhe udhëheqësi i Departamentit të Arsimit në Aleancën për Ardhmërinë e Kosovës, Jonuz Salihaj në një konferencë përmbyllëse për këtë vit ka thënë se moszbatimi i legjislacionit, analfabetizmi, rrjeti i fragmentuar i shkollave, unifikimi i sistemit arsimor, si dhe politizimi i skajshëm, janë disa nga çështjet e dobëta të cilat e kanë përcjell arsimin gjatë vitit 2012.

“Pikë tjetër e dobët e sistemit arsimor është analfabetizmi. Një sistem arsimor nuk mund të jetë efikas nëse kemi shkallë të lartë të analfabetizmit dhe klasik dhe funksional. Pikë tjetër shumë e dobët e sistemit arsimor, është politizimi i skajshëm i arsimit. Ndërhyrja e MASHT-it dhe rektoratit në politikat e njësive akademike”, ka thënë Salihaj.

Po ashtu, si pikët tjetër të dobët, Salihaj përmendi infrastrukturën shkollore, ndërhyrjen e MASHT-it në Agjencionin e Akreditimit si dhe mosinspektimi dhe mosmonitorimi i shkollave dhe universiteteve. (RTK)

Shpërndaje.
© RAJONIPRESS