Për LDK-në është krejtësisht e papranueshme mundësia e rishikimit të marrëveshjes ndërmjet tre liderëve politikë për zgjidhjen e krizës politike rreth zgjedhjes së presidentit.
Qëndrimi i tillë është ritheksuar pas mundësisë për rishikimin e kësaj marrëveshjeje, e cila nuk është përjashtuar nga shefi i grupit parlamentar të PDK-së, Adem Grabovci, i cili ka thënë se marrëveshja edhe mund të rishikohet nëse kjo do të ishte për të mirën e vendit.
“Nëse e ka thënë një zyrtar i PDK-së se mund të rishikohet marrëveshja, atëherë është deklaratë e papërgjegjshme, që tingëllon si mashtrim ndaj partnerëve dhe ambasadorit Dell”, ka thënë Ismet Beqiri, për “Tribuna Shqiptare”.
Duke komentuar faktin se Gjykata Kushtetuese është duke u angazhuar për të interpretuar nëse është kundërkushtetuese ndërprerja e mandatit pesëvjeçar të Jahjagës, Ismet Beqiri ka thënë se të gjithë janë peng të marrëveshjes.
“Aty kanë qenë ata që tash mund të bëhen sikur nuk kanë njohuri çfarë është arritur. Aty ka qenë edhe Jahjaga”, ka thënë Beqiri.
Ndërkohë, edhe qëndrimi i AKR-së është se nuk duhet të ketë asnjë lëkundje nga marrëveshja ndërmjet tre liderëve politikë. /Telegrafi/
