Laureati i Nobelit: Murakami, Roth apo Kadare?

Ata që kandidohen e presin me padurim. Ata që e fitojnë i gëzohen shumë. Çmimi Nobel për letërsi vazhdon të mbetet çmimi më i dashur për shkrimtarët. Kanë mbetur edhe pak ditë derisa ta marrim vesh se cili është laureati i këtij viti i Nobelit. Se kush do ta fitojë ende nuk dihet. Spekulimet janë të ndryshme.

Por, si duket, edhe sivjet, favorizues është shkrimtari japonez Haruki Murakami. Por, krahas tij, janë edhe dhjetëra shkrimtarë që e meritojnë këtë çmim. Philip Roth, Amos Oz, Margaret Atwood, Umberto Eco, Milan Kundera, Ismail Kadare, Salman Rushdie e shumë të tjerë janë në mesin e kandidatëve potencialë. Në mesin e tyre është edhe këngëtari i njohur Bob Dylan.

Shkrimtari Ag Apolloni beson se sivjet me këtë çmim do të nderohet shkrimtari amerikan Philip Roth, të cilin e quan legjendë të letërsisë bashkëkohore. “Sigurisht që unë nuk mund ta di se kush do të fitojë sivjet, por e di, po ashtu sigurt, që këtë çmim e meritojnë shkrimtarët e jashtëzakonshëm si: Roth, Eco, Barnes, Angelou, Oz, Adonis, Nooteboom etj.”, tha Apolloni. Ai shtoi se do t’i bëhej qejfi shumë sikur të fitonte Bob Dylan, të cilin e quajti një Pindar postmodern…(Tribuna).