Lamtumirë një juristi vizionar, avokati Shemsedin Pira kujton me dhimbje mikun dhe bashkëpunëtorin Fatmir Mehmeti

Gjilan – Më 27 prill 2026, u nda nga jeta Fatmir R. Mehmeti, jurist i diplomuar dhe bashkëpunëtor i afërt në zyrën e avokatisë, duke lënë pas një boshllëk të madh jo vetëm në profesion, por edhe në rrethin e miqve dhe familjarëve. Për avokatin Shemsedin Pira, kjo humbje është thellësisht personale.

Në një reagim emocional, ai e përshkruan Mehmetin jo vetëm si koleg shumëvjeçar, por si mik të afërt që nga fëmijëria.

“Ishte një jurist vizionar, i aftë të trajtonte dhe zgjidhte edhe çështjet më të ndërlikuara që kalonin nëpër duart tona çdo ditë,” shprehet ai.

Mehmeti kujtohet si një njeri i afërt, komunikativ dhe me një etje të pashuar për dije. Përkushtimi i tij ndaj arsimit reflektohej edhe në kujdesin për edukimin e fëmijëve të tij, duke lënë një gjurmë të thellë si prind dhe profesionist.

Lajmi për ndarjen e tij nga jeta erdhi papritur në orët e hershme të mëngjesit, pikërisht në momentin kur kolegët po përgatiteshin për një ditë të zakonshme pune.

“Familja humbi më të dashurin e tyre, ndërsa ne humbëm një bashkëpunëtor të jashtëzakonshëm, kontributi i të cilit nuk do të mbulohet kurrë nga pluhuri i harresës,” thekson Pira.

Fatmir R. Mehmeti do të kujtohet për profesionalizmin, përkushtimin dhe njerëzillëkun e tij, vlera që e bënë të pazëvendësueshëm në jetën e atyre që e njohën.

I ndjeri u prehtë në paqe.