Kuvendi Komunal i Vitisë miraton vendime të rëndësishme për pronat, bashkëpunimin ndërkombëtar dhe projektet lokale

Viti – Kuvendi Komunal i Vitisë ka mbajtur mbledhjen e katërt të rregullt, ku u shqyrtuan dhe u miratuan një sërë pikash me rëndësi për zhvillimin lokal dhe funksionimin institucional.

Një nga çështjet kryesore në rend dite ishte miratimi i listës së veçantë të pronave të paluajtshme komunale, të cilat planifikohen të jepen në shfrytëzim gjatë vitit 2026.

Në këtë kuadër, u formua edhe komisioni për shqyrtimin e procedurave dhe vlerësimin e ofertave për dhënien në shfrytëzim të këtyre pronave.

Gjatë mbledhjes u diskutua dhe u shqyrtua edhe marrëveshja e bashkëpunimit ndërmjet Komunës së Vitisë dhe Saint Julien en Genevois nga Franca, me synim thellimin e bashkëpunimit ndërkombëtar dhe shkëmbimin e përvojave.

Një tjetër pikë me interes ishte propozim-vendimi për ndryshimin e destinimit të një parcele në pronësi juridike të shkollës në fshatin Sllatinë, me qëllim ndërtimin e një çerdheje të re. Ky projekt u vlerësua si i rëndësishëm për komunitetin lokal, duke synuar përmirësimin e kushteve për kujdesin ndaj fëmijëve.

Po ashtu, kuvendarët shqyrtuan edhe një deklaratë mbështetëse për eliminimin e të gjitha formave të dhunës ndaj grave në politikë dhe në jetën publike, duke reflektuar angazhimin institucional për barazi dhe përfshirje.

Mbledhja u përmbyll me pikën e zakonshme të pyetjeve dhe përgjigjeve, ku këshilltarët adresuan çështje të ndryshme në interes të qytetarëve./rajonipress/