Kuvendi Komunal i Kamenicës miraton me shumicë votash të gjitha pikat e rendit të ditës në mbledhjen e shtatë

Kamenicë – Kuvendi Komunal i Kamenicës ka mbajtur mbledhjen e shtatë të rregullt, në të cilën janë shqyrtuar dhe miratuar me shumicë votash një sërë vendimesh dhe raportesh me rëndësi për funksionimin e komunës dhe realizimin e projekteve zhvillimore.

Seanca u drejtua nga kryesuesja e Kuvendit Komunal, Arbnore Beqiraj-Fera, ndërsa të pranishëm ishin kryetari i Komunës, Kadri Rahimaj, nënkryetarja Arta Bajralija, anëtarët e Kuvendit Komunal, drejtorët komunalë, përfaqësues të organizatave joqeveritare dhe të tjerë.

Në fillim të mbledhjes u miratua procesverbali i seancës së kaluar, ndërsa më pas u zhvillua sesioni i pyetjeve të legjislativit drejtuar ekzekutivit. Kuvendi shqyrtoi edhe Raportin e Punës së Kryetarit të Komunës për periudhën janar–qershor 2026, si dhe Raportin Financiar Buxhetor për tremujorin e dytë të vitit.

Gjatë mbledhjes u miratuan edhe disa propozim-vendime me rëndësi për zhvillimin komunal, përfshirë buxhetimin e bashkëfinancimit dhe krijimin e kodit të ri për projektin e asfaltimit të rrugës “Shyt Vaku”, përcaktimin e kompensimit për anëtarët e Komisionit Komunal të Aksionarëve në KRM “Higjena” dhe NPL “Dardana” Sh.A., si dhe vendimet që lidhen me dhënien në shfrytëzim të pronës komunale dhe formimin e komisioneve përkatëse për zbatimin e procedurave.

Po ashtu, Kuvendi miratoi ndarjen e mjeteve financiare për Kryqin e Kuq të Kosovës – Dega në Kamenicë, emërimin e nënkryetarit të Komunës për Komunitete, ndryshimet në komisionin për përzgjedhjen e drejtorëve dhe zëvendësdrejtorëve të institucioneve arsimore, si dhe shfuqizimin e disa vendimeve të mëhershme.

Me propozim të kryesueses Arbnore Beqiraj-Fera, rendi i ditës u plotësua edhe me disa pika shtesë, ndër to propozim-vendimi për rialokime dhe transfere buxhetore, ndryshimin e destinimit të një parcele nga “zonë minerare” në “tokë industriale”, dhënien e pëlqimit paraprak për shfrytëzimin e pronave komunale në zonën e Qendrës Tregtare Zejtare, si dhe formimin e komisioneve për vlerësimin e shprehjeve të interesit për dhënien në shfrytëzim të pronës së paluajtshme komunale.

Pas diskutimeve të zhvilluara nga asambleistët, të gjitha pikat e rendit të ditës, përfshirë edhe ato të shtuara gjatë seancës, u shqyrtuan dhe u miratuan me shumicë votash, duke i hapur rrugë zbatimit të vendimeve në funksion të zhvillimit të Komunës së Kamenicës dhe përmirësimit të shërbimeve për qytetarët./rajonipress/