Kuvendi i Kllokotit miraton planin zhvillimor dhe urban

Gjilan – Kuvendi Komunal i Kllokotit në seancën e jashtëzakonshme ka miratuar planin zhvillimor urban për këtë komunë .Vendimi i cili u miratua me shumicën e votave të këshilltarëve të pranishëm i mundëson Kllokotit që pas planit zhvillimor komunal për të gjithë komunën të kenë edhe një plan urban .

Zharko Dejanoviq, kryesues i Kuvendit komunal, ka thënë se miratimi i këtij plani është i nevojshëm për komunën e Kllokotit, pas ai paraqet bazë të mirë për rregullimin urban dhe për të tërhequr sa më shumë investitor në Kllokot.

Edhe drejtori i urbanizmit Sergjan Vesiq, është shprehur se për hartimin e këtij dokumenti ndihmë më të madhe ka dhënë projekti “LOGOS ” i Qeverisë zvicerane i cili ka mbështetur Komunën e Kllokotit me ekspert dhe në fusha të tjera të ndryshme.

Ndërkaq, Ismajl Baftjari konsulent i Projektit LOGOS, ka thënë se për hartimin e planit zhvillimor urban të Kllokotit është punuar një kohë të gjatë dhe ky plan përmes diskutimeve publike me qytetarët është punuar në atë mënyrë që të jetë në bazë të interesave të përgjithshme të qytetarëve dhe lehtë i zbatueshëm./rajonipress/