Kushtetuesja rrezikon të mbetet pa kuorum

Përfundimi i mandatit të tre gjyqtarëve ndërkombëtarë në Gjykatën Kushtetuese mund të lërë pa kuorum këtë të fundit.

Gjykata Kushtetuese së shpejti mund të futet në një gjendje paralize, për shkak se pas disa muajsh u skadon mandati tre prej gjyqtarëve ndërkombëtarë. Ata kanë mandat deri më 31 gusht, ndërkohë që Kuvendi i Kosovës ende nuk është njoftuar nga Gjykata për këtë gjë, në mënyrë që më pas të hapen procedurat për përzgjedhjen e anëtarëve të rinj të Kushtetueses – shkruan gazeta Tribuna.

Në fakt, ligji për Gjykatën Kushtetuese e përcakton qartë se Kuvendi duhet të njoftohet të paktën gjashtë muaj më herët.

Pas miratimit të pakos së ligjeve për tejkalimin e mbikëqyrjes së pavarësisë, ka mbetur e hapur dilema nëse GjK duhet të vazhdojë të ketë në përbërje të saj gjykatës ndërkombëtarë apo nga shtatori duhet të ketë vetëm gjykatës vendorë. Përgjigje për këtë nuk ka as në Kuvendin e Kosovës. Me ndryshimet që qenë bërë në Ligjin për Gjykatën Kushtetuese vetëm qe përcaktuar se “Mandati i gjykatësve ndërkombëtarë të emëruar në pajtim me Kushtetutën do të vazhdojë sipas kushteve dhe dispozitave të caktuara në vendimin për emërim”.