Kurti: Serbia zhvilloi stërvitje ushtarake në vendin e varrit masiv me trupat e 774 shqiptarëve

Kryeministri i Kosovës, Albin Kurti, ka reaguar pas stërvitjes së sotme të ushtrisë serbe në Batajnicë, ku gjatë luftës në Kosovë forcat serbe transportun dhe fshehën në një varrezë masive trupat e 744 civilëve shqiptarë të vrarë në luftë.

Forcat e Armatosura të Serbisë prezantuan sot në aeroportin e Batajnicës pajisjet dhe aftësitë e reja të pjesëtarëve të saj, ndërsa në ekspozitën “Granit 2023” mori pjesë kryesia shtetërore e udhëhequr nga presidenti Aleksandar Vuçiq.

Ndaj kësaj ngjarje, ku morën pjesë edhe politikanë serbë nga Kosova, ka reaguar kryeministri Kurti.

“Në një varr masiv në Batajnicë, u fshehën trupat e 744 shqiptarëve të Kosovës, përfshirë këtu 46 anëtarë të familjes Berisha. Në vend të një memoriali për viktimat e luftës, Serbia po zhvillon atje stërvitje ushtarake për ‘Ditën e Forcave të Armatosura’. Trupat mund të fshihen, por e vërteta nuk mund të varroset”, ka shkruar Kurti, transmeton Telegrafi.

Aty ishin edhe liderët politikë të serbëve nga Kosova. Në podium ishin krerët e Listës Serbe Milan Radoiçiq, Goran Rakiq, Igor Simiq, Dalibor Jevtiq dhe të tjerë nga kjo parti.

Në Batajnicë, në afërsi të Beogradit, në vitin 2001 janë zbuluar 744 trupa të civilëve shqiptarë të vrarë gjatë luftës në Kosovë, të cilët ishin bartur në atë varrezë masive.

Më shumë se 1,640 njerëz nga Kosova, shumica shqiptarë, ende konsiderohen si të pagjetur që nga përfundimi i luftës më 1999. /Telegrafi/