Kurti: Mërgata në Zvicër faktor i rëndësishëm

Sipas Lëvizjes Vetëvendosje, mërgata shqiptare duhet të faktorizohet politikisht, qoftë duke zgjedhur apo edhe duke u zgjedhur.

Përfaqësuesit e lëvizjes Vetëvendosje kanë kërkuar nga autoritetet zvicerane që të trajtojnë në mënyrën e duhur mërgatën shqiptare që jeton në këtë shtet. Vetëvendosje konsideron se mërgata shqiptare në Zvicër është një faktor i rëndësishëm i shoqërisë zvicerane dhe si e tillë duhet të integrohet edhe politikisht.

Këto komente përfaqësuesit e Vetëvendosjes, i kanë gjatë takimeve që kanë zhvilluar në kuadër të Kongresit të Partisë Socialdemokrate të Zvicrës që u mbajt në Lugano.

Me ftesën e Sekretarit për Marrëdhënie Ndërkombëtare të kësaj partie, Peter Hug, në konferencë kanë marrë pjesë, kryetar i Vetëvendosjes, Albin Kurti, sekretari për marrëdhënie me jashtë Xhelal Sveçla dhe Faton Topalli, drejtues i Komitetit për Mbrojtje Sociale.

Temë bosht në këtë Kongres , siç thuhet në një kumtesë të Vetëvendosjes, ishte demokratizimi i ekonomisë si dhe emigrantët dhe pozita e tyre në Zvicër.

Përfaqësuesit e këtij subjekti, zhvilluan takime të shumta individuale e grupore me politikanët e zyrtarët nikoqirë gjatë punimeve të këtij Kongresi.

Ata, sipas një kumtese të Vetëvendosjes, janë përqendruar kryesisht te përmirësimi i pozitës së mërgatës shqiptare në Zvicër.

“Mërgata shqiptare në Zvicër është një faktor i rëndësishëm i shoqërisë zvicerane dhe në të gjitha këto takime ekzistonte pajtueshmëria e të dyja palëve për të punuar drejt gjendjes sa më të mirë të mërgatës sonë”.

“Theks i veçantë iu dha nevojës që mërgata shqiptare politikisht të integrohet duke qenë pjesë e organizatave studentore, sindikatave të punëtorëve, forumeve të ndryshme, partive dhe institucioneve të Zvicrës dhe kështu të faktorizohet qoftë duke zgjedhur apo edhe duke u zgjedhur”, thuhet në komunikatë.

Po ashtu, përfaqësuesit e Lëvizjes Vetëvendosje shpalosën qëndrimin se të drejtat e migracionit të vjetër por edhe atij të ri duhet të garantohen dhe të ngrihen.

“Çështja e pensioneve të qytetarëve të Kosovës që me vite kanë punuar dhe kontribuar por edhe të atyre që vazhdojnë të punojnë e kontribuojnë në shoqërinë zvicerane.

Vërejtjes së dy zyrtarëve zviceranë për keqpërdorime të sigurimeve sociale të individëve, Lëvizja Vetëvendosje kërkon qasje individuale ndaj kësaj çështje e jo dënim e diskriminim grupor e në masë”, thuhet me tej në kumtesë .

Gjatë këtij Kongresi përfaqësuesit e Lëvizjes Vetëvendosje kanë zhvilluar takime me Peter Hug, sekretar për marrëdhënie ndërkombëtare i Partisë Social Demokrate, Michael Brandle, këshilltar i ministrit të punëve të brendshme të Zvicrës, David Rot, Kryetar i të rinjve të PSD-së, etj.(albinfo.ch)