Kurti me kërkesat e vjetra për emisarin e ri: Nënshkrim të marrëveshjes, dorëzim të Radojçiqit, tërheqje të letrës nga Bërnabiq

Kryeministri në detyrë i Kosovës, Albin Kurti, është takuar me emisarin e ri të BE-së për dialogun Kosovë-Serbi, Peter Sorensen, me të cilin kanë diskutuar për raportin e Kosovës me Serbinë dhe për marrëveshjen e arritur në vitin 2023, Gazeta shkruan Express.

Kurti ka përsëritur kërkesat e tij të vjetra në raport me atë se si duhet të ecet përpara me dialogun, duke kërkuar nënshkrimin e Marrëveshjes së vitit 2023 nga Serbia, dorëzimin e Radojçiqit dhe tërheqjen e letrës së Ana Bërnabiq nga BE-ja.

“Për të ecur përpara nevojitet nënshkrimi i marrëveshjes, tërheqja e letrës së ish-kryeministres Bërnabiq dhe dorëzimi i kryeterroristit Millan Radoiçiq, për të cilin tashmë ka aktakuzë 160 faqëshe nga Prokuroria e Republikës së Kosovës”, citohet të ketë thënë Kurti, njofton ZKM.

Kryeministri Kurti siç njofton komunikata, ka thënë se është absurde që Presidenti i Serbisë ia imponon dorëheqjen kryeministrit të Serbisë, Millosh Vuçeviq, por nuk e dorëzon Radoiçiqin./GazetaExpress/