Kurti: Duam qeveri normale jo tranzitore, LDK do të duhej ta kishte më të lehtë koalicionin me ne sesa në vitin 2020

Kreu i LVV-së, Albin Kurti, ka shkruar edhe për letrat për takime që ua ka drejtuar liderëve të PDK-së dhe LDK-së. Kurti ka përmendur në Këshillin e Përgjithshëm të partisë edhe ftesën për koalicion për kryetarin e LDK-së, Lumir Abdixhikun, por thotë se kjo u refuzua edhe më ashpër nga Abdixhiku, shkruan Gazeta Express.

Kurti ka thënë se LDK kishte bërë koalicion me LVV në vitin 2020 dhe tashmë pas reformave do të duhej ta kishte më të lehtë, por sipas Kurtit s’po duket ashtu, mbase sipas tij, LDK ndoshta ka preferenca të tjera.

Kreu i VV-së ka thënë se LVV do qeveri normale, jo të përkohshme, tranzitore, teknike apo të opozitës. Sipas Kurtit eksperimentet s’i bëjnë nderë e as dobi askujt.

“Shkrova edhe një letër për koalicion LVV-LDK por u refuzua edhe më ashpër. LDK në vitin 2020 bëri koalicion me ne, tani pas reformave do të duhej të ishte edhe më e lehtë, por s’po ngjanë ashtu. Ndoshta rruga e re ka preferenca të tjera. Ne duam qeveri normale, jo të përkohshme, tranzitore, teknike apo qeveri të opozitës. Opozita është opozitë sepse s’është qeveri. Qeveria e opozitës s’është e mundur. Duam qeveri normale. Eksperimentet s’na bëjnë as nder e as dobi”, ka thënë Kurti./GazetaExpress/