Kurti: Dialogu me Serbinë e ka suspenduar shtetëndërtimin

Lëvizja VV ka mbajtur sot në Besianë një tribunë, me temën “Ndalja e negociatave të cilat po na ndalin zhvillimin shtetëror, shoqëror dhe ekonomik” gjatë së cilës është thënë se bisedimet me Serbinë, pa asnjë kushtëzim, janë duke e dëmtuar shtetndërtimin dhe zhvillimin e vendit.

Albin Kurti, lider i kësaj Lëvizjeje, ka thënë se negociata po bëhen në mes të Qeverisë së Kosovës dhe Serbisë, janë duke dëmtuar shumë. “Këto bisedime janë bërë prioritet, dhe e kanë suspenduar shtetndërtimin dhe zhvillimin ekonomik të vendit. Varësia nga dialogu me Serbinë dhe varësia nga Serbia janë e njëjta gjë. Gjermania i ka vënë Serbisë 7 kushte, SHBA-të 4 kushte, Qeveria e Kosovës asnjë kusht. Prandaj, po përfundojmë të kushtëzuar nga Serbia. E ne kemi shumë më shumë arsye për t’i vënë kushte Serbisë, sesa Gjermania e SHBA-të”, ka thënë Kurti, thuhet në një komunikatë të kësaj lëvizje.

Sipas tij, Kosova me dy hapa konkretë mund të dalë në avantazh karshi Serbisë. Së pari, duke i ndalur këto negociata pa kushte dhe për çështje të brendshme të Kosovës, dhe së dyti, ndërprerja e mallrave të Serbisë në Kosovë.

“Atëherë do të ishim në ofenzivë, dhe do të nxirrnim kushte. Para çdo komunikimi me Serbinë, e lëre më negocimi, duhet të plotësohen një varg kushtet, siç janë: Kushti juridik legal – ndryshimi i kushtetutës dhe pranimi pavarësisë së Kosovës; Kushti humanitar dhe moral – kthimi i të pagjeturve dhe kërkimfalja për krimet e kryera; Kushti i drejtësisë- dorëzimi i mijëra kriminelëve që kanë kryer krime në Kosovë; Kushti politik – duhet të pushojë me shtypjen dhe diskriminimin e shqiptarëve të Luginës dhe duhet të pushojë se financuari strukturat në veri; Kushti i zhdëmtimit – për shtëpitë e rrënuara, bagëtitë e vjedhura, depozitat bankare po ashtu të vjedhura, kontributet pensionale, librat e amzës, kadastrat dhe artefaktet kulturore”, ka thënë Kurti.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).