Kurti dhe Murati flasin për rritje historike të pagës mesatare në sektorin privat, “më shumë se në 7 vitet e qeverive të kaluara”

Ministri në detyrë i Financave, Punës dhe Transfereve, Hekuran Murati, duke cituar Agjencinë e Statistikave të Kosovës (ASK), ka shkruar se paga mesatare bruto në Kosovë për vitin 2024 është 598 euro.

Ai ka thënë se kjo tregon punën e Qeverisë Kurti për sektorin privat. Sipas tij nuk ka qeveri më miqësore me bizneset sesa ajo e Kurtit.

Postimin e Muratit e shpërndau edhe kryeministri në detyrë Albin Kurti, i cili tha se kjo rritje e pagave është më e madhe sesa e gjithë rritja e pagës mesatare marrë së bashku në shtatë vjet të qeverisjeve të kaluara.

“Në vitin 2024, krahasuar me katër vjet më parë, paga mesatare në sektorin privat është rritur për 50% (neto) përkatësisht 57% (bruto). Nga mbështetja që i kemi dhënë sektorit privat kanë përfituar edhe bizneset edhe punëtorët, edhe shteti edhe qytetarët. Sipas Agjencisë së Statistikave të Kosovës paga mesatare në sektorin privat në vitin 2024 ka shënuar rritjen më të lartë ndonjëherë krahasur me vitin paraprak – kjo rritje është më e madhe sesa e gjithë rritja e pagës mesatare marrë së bashku në shtatë vjet të qeverisjeve të kaluara”, shkroi Kurti.