Kur e hap pusin (bunarin) e ri, mos e pështyj të vjetrin!

Nga Shefik Sadiku – Kështu na ka mësuar një urti e jona kolektive. Policia e Kosovës të dielën e 24 shtatorit të vitit 2023 jo vetëm që e mbrojti integritetin e Shtetit tonë, por ajo na bëri krenar dhe na e shtoi besimin, i cili nuk ka munguar asnjëherë, te ky institucion, pra te policia jonë. Policia e Kosovës nuk është formuar dje, as pardje, as vetëm më 24 shtator. Jo. Ajo tashmë ka kaluar moshën dy dekadëshe nga lindja e saj.

Kosova ishte para një kurthe tejet perfide që e ideoi Serbia, por falë profesionalizmit dhe gjakftohtësisë së policëve tanë, ajo kurthë dështoi. Kurrë nuk do të zbulohet qëllimi i aktit terrorist të shkaktuar të dielën e kaluar në Manastirin e Banjskës, por fare lehtë kuptohej synimi terrorist për ta shkaktuar një masakër mbi pelegrinët dhe priftërinjtë serbë për ta akuzuar më pas Kosovën.

Ky ugurzi u pengua nga djemtë tanë policë, të cilët vunë në rrezik jetën e tyre për ta mbrojtur Shtetin e Kosovës. Ata ishin të gatshëm për të vdekur për shtetin, jo për pushtetin. Në ato qaste të rënda dhe të vështira për vendin, ata zbatuan profesionalizmin dhe patriotizmin. Në ato momente ata e mendonin Kosovën, jo kastat politike të shkuara dhe aktuale.

Të dielën, më 24 shtator 2023 mëngjesi filloi tragjikisht për Kosovën, por mbrëmja e asaj dite solli dy fitore të rëndësishme për Kosovën. E para, në rrafshin e sigurisë neve na u kthye dinjiteti i merituar dhe e dyta, në rrafshin politik Kosova fitoi bindshëm kundër terrorizmit.

E diela e 24 shtatorit shkërmoqi postulatin tonë fatalist se sa herë ndërrohen pushtetet te ne ,për fat të keq fillon “numërimi” i kohës rishtas! Pra jo degët apo rrënjët e pemës janë më të të rëndësishme, por pa rrënjë dhe degë pema nuk jep fryte.

Këtu pra shifet porosia e urtisë se, “ Kur e hap pusin e ri, kurrë mos e pështyj të vjetrin”. Personalisht, ndonëse pa dyshim se gëzohem për fitoren në rrafshin e sigurisë, më shumë më gëzon fitorja në rrafshin politik. Se kush është terrorist e kush kundër terrorizmit, bota demokratike e pa me sy më 24 shtator 2023.

Nuk guxojmë t’i lejojmë vetes të ekzaltohemi nga fitorja operative e Policisë sonë, por duhet të dimë mençurisht ta fitojmë luftën politike dhe vigjilencën ta bëjmë kod të syqeltësisë sonë shtetërore./rajonipress/