Kundër ndërrimit të statusit të Bashkësisë Islame në Luginën e Preshevës

Gjilan – Në një letër – reagim që Xhabir Hamiti kryetar i Kuvendit të BIK i ka dërguar kryesisë së Bashkësisë Islame të Kosovës thuhet se konsiderojmë se një vendim i tillë nga ana e Kryesisë është i njëanshëm dhe jo legjitim.

Në reagim thuhet se kohë më parë Kryesia e Bashkësisë Islame e Kosovës, gjegjësisht më datë 18 dhjetor të vitit 2012, ka qëndruar në Luginën e Preshevës duke mbajtur takim me përfaqësuesit fetar të kësaj treve, me qëllim të riorganizimit të zgjedhjeve, në kuadër të Luginës së Preshevës, me qëllim të themelimit të një Bashkësie Islame nën një emërtim të ri në kuadër të kësaj Lugine.

Sipas Xhabir Hamitit riorganizimi i ri i BI të kësaj Lugine, nënkupton edhe ndryshimin e statusit të saj, për çfarë nuk është njoftuar Kuvendi i BIK-ut , i cili është organi kompetent, dhe i cili duhet të vendos për ndryshimin, suspendimin, shkëputjen apo lidhjen e të gjitha institucioneve dhe organeve në kuadër të BIK-së.

“Konsiderojmë se një vendim i tillë nga ana e Kryesisë është i njëanshëm dhe jo legjitim. Anashkalimi i Kuvendit në vendimmarrje për çështje të ndodhura së fundi në BIK , nuk janë veprime të cilat përkojnë për një mirëqenie afatgjate të BIKut, dhe për të cilat nuk do të diskutohet në të ardhmen” thuhet në reagimin e nënshkruar nga Xhabir Hamiti, kryetar i Kuvendit të BIK-ut./rajonipress/