Kujtohet 24 Marsi në Viti, homazhe pranë memorialit të Madeleine Albright

Viti – Me rastin e 27-vjetorit të fillimit të bombardimeve të NATO-s, institucionet komunale të Vitisë kanë bërë homazhe pranë memorialit të ish-Sekretares amerikane të Shtetit, Madeleine Albright, në shenjë nderimi dhe mirënjohjeje për kontributin e saj të jashtëzakonshëm në lirinë e Kosovës.

Në këtë aktivitet përkujtimor, përfaqësues të institucioneve komunale, së bashku me Policinë e Kosovës dhe Organizatën e Veteranëve të Ushtrisë Çlirimtare të Kosovës, vendosën lule pranë memorialit, duke kujtuar një nga momentet më vendimtare në historinë moderne të vendit.

Madeleine Albright mbetet një nga figurat më të rëndësishme ndërkombëtare që mbështeti ndërhyrjen e NATO-s në vitin 1999, duke kontribuar në ndaljen e spastrimit etnik dhe hapjen e rrugës drejt çlirimit dhe shtet ndërtimit të Kosovës.

24 Marsi simbolizon kthesën historike drejt lirisë dhe mbetet një kujtesë e përhershme për sakrificën e popullit tonë dhe mbështetjen e aleatëve tanë ndërkombëtarë.

Lavdi të gjithë atyre që kontribuuan për lirinë e Kosovës!