Kuçi: Pas ristrukturimit, EULEX pa kompetenca ekzekutive

Qeveria e Kosovës kërkon që 15 qershori të jetë datë përfundimtare kur EULEX-i do të shkarkohet nga kompetencat ekzekutive, për t’ia kaluar ato vendorëve, dhe mandati i tij të kalojë kryesisht në pjesën e monitorimit, mentorimit dhe këshillimit.

Këtë e konfirmon për RTK-në zëvendëskryeministri Hajredin Kuçi. Sipas tij, në përjashtim të rasteve aktuale, po vazhdohet me negocimet që pas 15 qershorit roli i misionit të EULEX-it të jetë krejtësisht ndryshe dhe se marrëveshja përfundimtare do të jetë në mes Kosovës e BE-së, e ratifikuar në Kuvendin e Kosovës

Kuçi do të jetë në krye të negociatave për ristrukturimin e EULEX-it. E kjo, sipas tij, do të bëhet në bashkëpunim me akterët politik vendorë dhe ndërkombëtarët.

“Sikurse mbikëqyrja e pavarësisë, ashtu edhe misioni i EULEX-it do të përfundojë në përputhshmëri të plotë në mes institucioneve të Kosovës dhe aktorëve ndërkombëtar”, siguroi Kuçi.

Ai theksoi për RTK-në se një prej detyrave që do ta ketë ky mision pas ristrukturimit, do të jetë edhe mbikëqyrja e marrëveshjeve të arritura në mes Prishtinës e Beogradit.

Sipas Kuçi, me këtë hap Kosova nuk po e izolon vetën nga BE-ja, përkundrazi, Kosova po e ushtron sovranitetin e vet në mënyrë të plotë sikurse të gjitha shtetet e pavarura dhe njëkohësisht po hyn si partnere e barabartë edhe në partnership me BE-në.