Kthehet Skënderi

Ish-sekretari i suspenduar i Ministrisë së Infrastrukturës, Skënder Gashi, do të kthehet në ministri. Jo si sekretar, por si drejtor i ndonjë departamenti.

Vendimin për këtë punë e ka marrë Kryesuesi i Këshillit për Emërime të Larta – zëvendëskryeministri Hajredin Kuqi. Në Ministrinë e Infrastrukturës thonë se të gjitha pozitat e drejtorëve janë të zëna.

Ministria e Infrastrukturës ka filluar t’i kthejë zyrtarët e saj disa kohë pasi i ka suspenduar. Pas drejtorit të prokurimit, i cili u kthye në këtë ministri para një jave, tash po kthehet ish sekretari i ministrisë Skënder Gashi. Jo si sekretar, por si drejtor në njërën prej departamenteve.

Gashin, ministri Fehmi Mujota e largoi nga pozita e sekretarit, për keqpërdorim detyre, keqmenaxhim e shumë akuza të tjera, prapë do të punojë në këtë ministri.

Vendimin e ka nënshkruar zëvendëskryeministri i Kosovës, Hajredin Kuqi, si kryesues i Këshillit për Emërime të Larta.

Por Gashi që pretendonte se Mujota e pati larguar nga puna vetëm se e kishte mbrojtur LDK-në, pasi nuk ishin të së njëjtës parti, nuk do të gëzojë më privilegjet si sekretar i përgjithshëm i Ministrisë së Infrastrukturës, pozitë kjo të cilën e mbajti deri në janar të vitit 2012.

Në vendimin e nxjerrë këtë javë nga Këshilli për Emërime të Larta i Qeverisë së Kosovës, thuhet se Gashi duhet të sistemohet në një pozitë më të ulët se ajo e sekretarit, ekuivalente me atë të drejtorit të departamentit.

Lajmin e ka konfirmuar vetë Gashi për gazetën Express duke treguar se vendimin për kthimin e tij në punë e ka marrë zyrtarisht të hënën.(express)