Kthehen shikuesit, por edhe fitorja

Gjilan- Drita ka shënuar fitoren e dytë radhazi e kësaj radhe ndaj Drenicës së motivuar, që në fund u desh të kthehet duarthatë.

Është dashur të kalojë dënimi prej dy ndeshjeve, që sërish të kthehen shikuesit, të cilët ka mundur t’i kënaq vetëm fitorja.

Paralajmërimi i Dritës për fitore erdhi në fillim të ndeshjes, por Abazi nga afërsia gjuajti jashtë golit, kurse në aksionin vijues ka provuar Dajaku, por Latifaj me mund e priti topin.

Edh,e Armend Kastrati ka provuar në minutën 20, kur gjuajti jashtë, derisa në minutën 26, së pari Gërbeshi e më pas edhe Jetullahu, nuk dolën më të mirë se portieri Avdyli, i cili shkëlqyeshëm dëboi topin që po shkonte drejt rrjetës.

Atë që nuk e bënë nga loja, vendasit e bënë nga ndërprerja, kur pak para se gjyqtari të tregonte fundin e pjesës së parë, duke mos ditur se a do të gjuaj Sermaxhaj, apo Jetullahu, portieri Avdyli nuk e kishte ndërtuar murin ashtu si duhet e Jetullahu gjuajti aq furishëm, sa portieri mysafir vetëm me shikim e përcolli topin që po futej në rrjetë.

Në pjesën e dytë mysafirët u këndellën, ashtu edhe si vendasit që qenë të përqendruar. Drenica nuk ia doli të shëmojë, e Drita diti të mbrohej, andaj nuk pati ndryshime në rezultat, gjë për të cilën më i kënaqur ishte ekipi vendas.

Thanë pas ndeshjes:

Bekim Isufi (Drita): “Në pjesën parë ishim më të mirë dhe shënuam gol me meritë, pro në pjesën e dytë ka mbizotëruar Drenica e ne u desh të ruajmë rezultatin”.

Fadil Rama (Drenica): “Drita ishte më e mirë në pjesën e parë e Drenica në të dytën. Morëm një gol naiv dhe të lehtë e në pjesën e dytë përkundër rasteve që patëm nuk ia dolëm të shënojmë”.

Drita Drenica 1: 0 (1:0)

Stadiumi i Qytetit në Gjilan. Shikues: 300. Gjyqtarë: Artan Hoxha, Ali Peshteri, Gëzim Mehmeti. Shënues: Labinot Jetullahu 45’. Kartoni i verdhë: Latifaj, Hashani, Kastrati, Isufi, Abazi(Drita), Bejta (Drenica).

Drita: Latifaj, P, Osmani, Hashani, Gërbeshi, Jetullahu, Ve. Sermaxhaj, Syla, Kastrati (Isufi), F. Osmani, Foniqi (Vi. Sermaxhaj), Abazi (Sejdiu).

Drenica: Avdyli, Rrahmoni, Geci, Bejta, Sahiti, Maxhuni (Lushtaku), Statovci, Kaqiu, Zeneli (Hamiti), Dajaku, Gashi (Bajraktari)./rajonipress/