Kryqi i Kuq i Kosovës ndihmon Kamenicën

Gjilan – Rexhep Morina, sekretar i Kryqit të Kuq dega në Kamenicë, ka thënë se pas pranimit të mallit nga Kryqi i Kuq i Kosovës për 70 familjet e dëmtuara nga era e fort, stafi i kryqit të kuq menjëherë ka filluar shpërndarjen e ndihmave në teren.

Sipas tij shpërndarja do të bëhet për të gjitha ato familje që janë në listat e degës së Kryqit të Kuq në Kamenicë. Familjet përfituese do marrin 25 kg miell, një pako ushqimore, një pako higjienike, 2 batanije, një dyshek, 2 komplete me ujë të thjesht ka thënë Morina.

Përveç ndihmave të dhuruara nga Kryqi i Kuq i Kosovës edhe Fitim Gagica pronar i hotel “Jehona” ka dhuruar 15 thasë miell për skamnor. “Mbesim me shpresë se gjatë javës do të vizitohen të gjitha familjet përfituese dhe do të furnizohen me ndihmat e dedikuara për këto familje. Në emër te familjeve përfituese i falënderojë donatorët për ndihmën e dhuruar” ka thënë Morina.

Ndërkaq Ruxhdi Qehaja drejtor për mbrojtje dhe shpëtim tha për rajonipress se këto ndihma e zbusin gjendjen e atyre familjeve me kushte ekstreme të jetesës. “Kjo është faza emergjente e ndihmave, kurse ne presim që në të ardhmen të ndahen mjete financiare ose material i nevojshëm për familjet që u janë dëmtuar pullazet apo muret “ tha Qehaja./rajonipress/