Kryesuesit kërkojnë paga më të larta

Gjilan- Kryesuesit e Asambleve Komunale të Kosovës të mbledhur në Kamenicë të enjten, në një drekë pune, kërkuan njëzëri paga më të larta. Nga takimi i kolegjiumit, doli edhe rekomandimi për riemërtimin e pozitave të kryesuesve dhe ndryshimin e ligjit për Vetëqeverisje Lokale.

Kryesuesi i Kuvendit të Kamenicës, Enver Mavriqi,ka thënë se takimi i sotëm ka për qëllim familjarizimin mes drejtuesve të Kuvendeve, por edhe krijimin e një strategjie të përbashkët, që do të jetë në të mirë të të gjitha komunave të Kosovës.
“Ashtu sikurse komunat e tjera, edhe Kamenica ka halle e probleme. Komuna është parakusht për zhvillimin e shtetit, pra nëse punët në komunë ecin mirë, edhe shteti do të ecë përpara”, tha Mavriqi.

Ndërsa, kryetari i Komunës, Shaip Surdulli në fjalën përshëndetëse foli për raporte relativisht të mira në mes të legjislativit dhe ekzekutivit në Kamenicë.
“Unë çdo herë jam i pranishëm në Kuvend, edhe pse ndoshta dikush nuk ka qejf mem pa aty. Konsideroj që prezenca ime në seanca të Kuvendit e ndihmon punën e këtij organi. Qytetarët donë një administratë dhe Kuvend sa më efikas, në mënyrë që shërbimet e tyre të kryhen në mënyrë sa më të shpejtë dhe tu krijohen kushte më të mira për jetë”, u shpreh Surdulli.

Infrastruktura ligjore, identifikimi i rregulloreve komunale, shkëmbimi i përvojave, hartimi dhe standardizimi i akteve juridike, ishin disa nga çështjet e diskutuara në takim.
Nga ky takim pjesëmarrësit janë shoqëruar edhe me pije dhe ushqim të bollshëm./rajonipress/radiopremiera/