Kryeprokurori Lumezi flet për të riatdhesuarit nga Siria: Kemi nisur hetimet ndaj katër të arrestuarve

Kryeprokurori i Shtetit, Aleksandër Lumezi, ka deklaruar se katër shtetas të Kosovës të cilët dyshohen përpjesëmarrje në luftëra të huaja janë ndalur nga Policia e Kosovës.

Lumezi në një konferencë për media ka thënë se për katër personat, Prokuroria Speciale e Republikës së Kosovës, ka zhvilluar hetime ndaj tyre edhe në vitet e kaluara.

“Kemi filluar procedurën penale ndaj personave të riatdhesuar në Kosovë. Për katër persona Prokuroria Speciale e Republikës së Kosovës, ka zhvilluar edhe në vitet e kaluara hetimet ndaj tyre. Pas ndërmarrjes së veprimeve të mjaftueshme dhe sigurimit të provave dhe dyshimit të arsyeshëm se ata kanë kryer veprën penale ‘pjesëmarrja në grupe të organizuara për kryerjen e veprave penale terroriste dhe pjesëmarrja në luftëra, reformacionet jashtë territorit të Republikës së Kosovës’, për të cilat ndëshkueshmëria e veprave penale është nga 3 deri në 15 vjet, kemi filluar hetimet dhe pas ndërmarrjes së veprimeve të caktuara hetimore e kemi pezulluar procedurën penale, duke pasur parasysh se personat që kanë qenë të përfshirë në aktvendimin për zhvillimin e hetimeve nuk kanë qenë të arritshëm për autoritet ndjekëse të Republikës së Kosovës”, ka thënë Lumezi.

Sipas tij, pas marrjes së informacioneve nga Policia e Kosovës, kanë marr vendimin për ndalimin e katër shtetasve të Republikës së Kosovës, të cilët kanë marr pjesë si luftëtarë në Siri.

“Tani ata janë nën masën e ndalimit dhe shumë shpejt pritet që brenda afateve ligjore që prokurori kompetentë i Prokurorisë Speciale të Kosovës, të ndërmerr masat ligjore për figurimin e prezencës së të pandehurve në procedurën penale”, theksoi ai.

Kryeprokurori Lumezi po ashtu tregoi se ndaj 119 personave kanë ngritur akte akuzuese, ndërsa 156 persona janë duke i hetuar.

“119 persona kemi ngritur akte akuzuese, ndërsa për 156 persona tjerë jemi në fazën e hetimeve. Pas marrjes se informacioneve për emrat e personave të cilët janë riatdhesuar për të cilët kemi nxjerr aktvendim për zhvillimin e hetimeve sigurisht që edhe ata do t’i procedojmë në procedurë penale”, u shpreh kryeprokurori i shtetit, Aleksandër Lumezi.

Ndërsa, prokurori Sylë Hoxha, ka thënë se ka pasur urdhërarrest në fuqi ndaj katër personave të dyshuar.

“Ndaj këtyre katër personave ka qenë në fuqi urdhër arresti, dhe në momentin që ndalohen nga policia sillen në Prokurori”, ka thënë Hoxha. /Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).