Kryeministri Mustafa kërkon gjithëpërfshirje në dialogun e Brukselit

​Kryeministri Isa Mustafa ka thënë se pavarësisht se Qeveria nën drejtimin e tij ka punuar në kushte të jashtëzakonshme të presionit dhe të dhunës, me sulme të pandërprera, përfshirë edhe ato fizike, ka treguar durim dhe ka arritur t’i realizojë synimet që ka para vetes.

Koalicioni qeverisës është stabil dhe bashkëpunues, i orientuar qartë kah zhvillimi ekonomik, integrimet evropiane, shteti ligjor dhe miqësia me SHBA’në, ka thënë Mustafa në një intervistë për “Epokën e re”.

Ai e ka quajtur zgjidhje të pranueshme emërimin e Hajredin Kuçit zëvendëskryeministër, e të Enver Hoxhajt ministër të Punëve të Jashtme.

Kryeministri Mustafa ka thënë se nuk do të ketë zgjedhje deri më 10 qershor 2018.

Duke folur për liberalizimin e vizave, Mustafa ka theksuar se para se të ndodhë votimi në Parlamentin Evropian dhe në Këshillin e Evropës, Kosova do të duhej ta ketë ratifikuar marrëveshjen me Malin e Zi për kufijtë.

Sa i përket formatit të dialogut në Bruksel, kryeministri Mustafa ka thënë se është në interes të vendit të kemi një gjithëpërfshirje në dialog edhe nga Zyra e Presidentit, Kuvendi, por edhe nga shoqëria civile.