Sveçla: Ekziston qasje bllokuese e partive opozitare

Dje për herë të 30 ka dështuar përpjekja për konstituimin e Kuvendit të Republikës së Kosovës. Xhelal Sveçla, ministri në detyrë i Punëve të Brendshme në Qeverinë e Kosovës, në “RTK Prime”, i pyetur për moskonstituimin e Kuvendit, tha “është e qartë se ekziston një qasje bllokuese e partive opozitare”.

“Për çdo seancë, çdo 48 orë, ata shkelin Kushtetutën. Është vendim i Gjykatës Kushtetuese që deputetët duhet të votojnë në seancat parlamentare për, kundër apo të abstenojnë. Pra, deputeti ka të drejtë të votojë si të dojë, por jo mos të votojë”, shtoi ai.

Seanca e radhës mbahet të premten duke filluar nga ora 11:00./Indeksonline/