Krijohet sistemi i unifikuar i adresave për komunën e Vitisë

Gjilan -Agjencioni kadastral norvegjez, ka filluar së implementuari projektin që ka të bëjë me krijimin e një sistemi të unifikuar të adresave për Kosovë, duke i ofruar mbështetje Agjencisë kadastrale të Kosovës dhe komunave.

Ky projekt parasheh identifikimin e të gjitha rrugëve nëpër lokalitete e poashtu vendosjen e numrave të shtëpive. Projekti ka filluar të realizohet në komunën e Vitisë dhe ai do të zgjasë 6 muaj.

Metush Bajrami drejtor i Urbanizmit dhe Planifikimit Hapësinor në Viti, tha se në kuadër të këtij projekti do të punësohen 6 persona, kurse projekti do të realizohet brenda 6 muajsh në dy faza, atë të mbledhjes së të dhënave dhe futjen e tyre në sistemin e informimit të regjistrit të adresave. “Është projekt për staf mbështetës të komunës për implementimin e sistemit të adresave. Stafi do të përbëhet prej 6 personash dhe njëri ndër ta do të caktohet si ekspert që do të udhëheq me stafin.

Eksperti do të bashkëpunoj ngushtë me stafin përgjegjës të komunës për të identifikuar pikën e fillimit dhe të mbarimit të çdo rruge për qëllime emërtimi, për të identifikuar çdo hyrje unike që ka qasje në rrugë dhe për të caktuar emrat e rrugëve dhe numrat e adresave”, tha Bajrami.

Ai theksoi se ky projekt është shumë i efektshëm për komunën e Vitisë, por edhe të institucioneve tjera ngase mund të kenë qasje më të lehtë në kërkimin e një adrese në ndonjë lokalitet të kësaj komune./rajonipress/