Krichbaum: Serbia duhet t’i zgjidhë problemet me Kosovën

Kryetari i Këshillit të parlamentit gjerman për çështje të Bashkimit Evropian, Gunther Krichbaum ka thënë sot në Beograd, se është e domosdoshme që Serbia t’i zgjidhë problemet me Kosovën.

Një delegacion i politikanëve gjermanë dhe francezë, ka vizituar këto ditë Beogradin. Krichbaum për Novosti ka thënë se dialogu Prishtinë-Beograd është dashur të thellohet, por se në fund gjithçka që pritet është rezultati.

“BE-ja theksoi se marrëdhëniet bilaterale mes Serbisë dhe Kosovës duhet të përfundojnë para hyrjes në BE. Bashkimi Evropian nuk mundet të tolerojë një Qipro të re”, ka thënë ai.

Parlamentarët gjermanë dhe francezë kanë përsëritur në bisedat me zyrtarët serbë se është e domosdoshme të gjendet një zgjidhje afat gjatë për normalizimin e marrëdhënieve me Kosovën. Në këtë kontekst, ata kanë theksuar se është e rëndësishme të “ përgatitet terreni” te qytetarët për një zgjidhje të përhershme të këtyre marrëdhënieve”.