Krasniqi: Rita Ora, krenaria dhe vlera jonë origjinale

Prishtinë – “Puna jote, suksesi yt, gjithë ai imazhi yt që e ke transmetuar gjithandej globit ka bërë krenare gjithë Kosovën dhe të gjithë shqiptarët.

Për ne je imazhi më origjinal, krenaria dhe vlera që ka ky popull”, i ka thënë ministri i Kulturës, Rinisë dhe Sportit, Memli Krasniqi këngëtares së famshme nga Kosova, Rita Ora, me të cilën ka pasur sot një takim shumë miqësor në Hotel Emerald.

Ministri ka shprehur falënderimet më të mëdha për Ritën, e cila në çdo moment ka përmendur Kosovën dhe për më tepër ka zgjedhur vendin e saj, popullin e saj për të realizuar video-klipin e radhës. “Për mua është nder i veçantë që ju takoj dhe çfarëdo që bëjmë ne për ty është minimumi, pasi vërtetë puna jote meriton çdo respekt”, ka vijuar Krasniqi.

Ai e ka uruar për sukseset dhe ka thënë se populli i Kosovës, të rinjtë shqiptarë kudo që janë do të jenë çdo herë përkrah saj. “Kosova dhe institucionet do të jenë çdo herë pranë teje”, tha ministri. Ai i ka dhuruar asaj instrumentin e lashtë ilir, okarinën, si dhe hyjneshën në fron, si simbole të civilizimit të hershëm në Kosovë.

E Rita ka zgjedhur t’i japë ministrit albumin e saj të parë të titulluar “O.R.A.”, i cili ka disa ditë që është lansuar dhe është në top listën e albumeve më të pëlqyera në botë.

Rita Ora ka shprehur falënderime të veçanta për kujdesin e vazhdueshëm që është treguar ndaj saj.

“Unë po dua të them ty shumë faleminderit për krejt çka keni bërë. Pa ndihmën tuaj unë nuk do të mund të realizoja kaq lehtë gjithë ato xhirime”, ka thënë Rita, teksa ka shtuar se me video-klipin e saj dëshiron t’i tregojë botës se sa i bukur është vendi dhe populli i saj. Ajo tha se ky është prioritet i saj i përhershëm.

Rita ka folur për momentet nëpër të cilat ka kaluar deri tash në karrierën e saj dhe për planet në të ardhmen.

Sipas komunikatës zyrtare nga kjo ministri, MKRS-ja e ka mbështetur gjithë ekipin e Rita Orës në xhirimet që janë bërë për video-klip, duke i qëndruar pranë në çdo moment për ta bërë sa më të lehtë punën. Ministri Krasniqi është zyrtari i vetëm shtetëror që takohet me Rita Orën në këtë vizitë të saj.

Rita Ora ka ardhur në Kosovë për të xhiruar “Shine Ya Light”. Xhirimet janë bërë në pjesë të ndryshme të Prishtinës kryesisht, sidomos tek New Born, simboli i pavarësisë së Kosovës. Mijëra qytetarë e kanë përcjellë në vazhdimësi Ritën gjatë xhirimeve.

Shpërndaje.
© RAJONIPRESS