Krasniqi: Nuk i kam ftohur raportet me Limajn

Takimi mes liderëve që kanë arritur marrëveshjen politike për zgjedhjen e Atifete Jajagës në postin e presidentes, duhet të takohen edhe një herë për ta gjetur një zgjidhje tjetër.

Kështu ka vlerësuar kryetari i Kuvendit Jakup Krasniqi, pasi LDK-ja po bojkoton komisionin për reformë zgjedhore për shkak të mos zbatimit të marrëveshjes politike të vitit të kaluar

“Në politikë shpeshherë marrëveshjet iu japin problemeve shumë zgjidhje, por nëse marrëveshja e parë nuk ka dhënë shumë zgjidhje, duhet të takohen prapë dhe ta zgjidhin problemin”, ka thënë Krasniqi, transmeton KosovaTimes.

Ndërsa sa i përket dialogut, i pari i Kuvendit thotë se qytetarët e kanë zhvendosur vëmendjen tek dialogu duke i harruar problemet tjera që janë shumë më substanciale.

“I gjithë shoqëria kosovare i ka zhvendosur problemet tek një problem të imagjinuar. Dialogu nuk është problemi kryesor, pasi ka probleme shumë më substanciale se sa dialogu”, ka thënë Krasniqi, në një intervistë për KTV-në.

Ndërsa, duke komentuar shkrimet e fundit të medieve se ai dhe nënkryetari i PDK-së Fatmir Limaj kanë prishur raportet, ai iu është përgjigjur me pak fjalë.

“Është dëshirë e dikujt por nuk është e vërtetë”, u është përgjigjur Krasniqi shkrimeve të mediave.