Krasniqi: Kurti po i mban peng institucionet e Kosovës, duhet të ndryshojë kandidatin për kryetar të Kuvendit

Sërish, kandidatja për kryetare të Kuvendit të Kosovës nga radhët e Lëvizjes Vetëvendosje, Albulena Haxhiu, nuk arriti të kalojë në votim, e ky dështim i katërt për të zgjedhur Haxhiun në këtë pozitë ka nxitur reagime të forta nga opozita.

Kryetari i Partisë Demokratike të Kosovës, njëherësh deputeti, Memli Krasniqi, ka akuzuar kryeministrin në detyrë, Albin Kurti, për mbajtjen peng të institucioneve të Kosovës.

Sipas Krasniqit, Kurti nuk ka shumicën parlamentare të nevojshme për formimin e qeverisë, dhe kjo është arsyeja pse procesi i formimit të qeverisë është bllokuar, përcjell Telegrafi.

“Është e turpshme kjo që po bëhet. Problemi është që nuk kanë shumicë parlamentare dhe nuk kanë numra për të bërë qeverinë, Albin Kurti është duke e mbajt peng institucionet. Kjo vërtetë është e papranueshme”, ka thënë Krasniqi.

Ai tutje tha se Kurti dështimin e tij personal që nuk i ka votat të formojë Qeverinë e njëherësh të bëhet sërish kryeministër është duke e bërë këtë bllokadë.

Kurti duhet me ndrru këtë kandidat. Ai nuk i ka votat …Dështimin e tij personal që s’mundet mu bo kryeministër po dëshiron me lënë si pjesë të kësaj bllokadë të cilën është duke e bërë qëllimshëm. Ose duhet me konstituuar Kuvendi ose të shkojmë në zgjedhje të përgjithshme”, tha ndër të tjera ai. /Telegrafi/