Prishtinë – Haxhi Krasniqi vlerëson se me paraqitjen e së shtunës ka bindur të gjithë se është i gatshëm të luftojë për titull të botës në boks në kategorinë gjysmë të rëndë.
Krasniqi 25-vjeçar të shtunën në Berlin shkëlqeu kundër turkut me shtetësi gjermane, Serdar Sahin. Krasniqi fitoi me nokaut në raundin e katërt, në meçin që e dominoi plotësisht.
Boksieri nga Juniku, që jeton në Gjermani fitoi titullin “WBO International”, ndërsa thotë se tani radhën e ka titulli i botës në versionin WBO.
“Me paraqitjen time janë impresionuar të gjithë në klub, menaxherët e trajnerët. Më kanë përgëzuar për paraqitjen dhe tashmë janë plotësisht të bindur se jam i gatshëm për titull. Në fakt gjithnjë më kanë përkrahur, por me performancën e fundit i kam bërë plotësisht për vete”, ka thënë Krasniqi të dielën për gazetën. Ai në boksin profesionist njihet me emrin Robin. Është pjesë e kompanisë gjermane SES-Boxing.(koha)
