KPF në Viti shqyrton pasqyrat financiare dhe nismën për themelimin e ndërmarrjes publike lokale

Viti – Në mbledhjen e tretë të rregullt të Komitetit për Politikë dhe Financa (KPF) të Kuvendit Komunal të Viti, të mbajtur sot, fillimisht u paraqitën disa shqetësime të qytetarëve si dhe çështje jashtë rendit të ditës, për të vijuar më pas me shqyrtimin e pikave të parapara.

Në kuadër të rendit të ditës u trajtuan pasqyrat financiare të buxhetit komunal për periudhën janar–mars 2026. Sipas të dhënave të prezantuara, gjatë kësaj periudhe janë inkasuar gjithsej 184,510.38 euro të hyra vetanake, ndërsa shkalla e inkasimit ka arritur në 14.25 për qind. Krahasuar me të njëjtën periudhë të vitit 2025, të hyrat shënojnë rënie prej 26,707.01 eurosh.

Sa i përket shpenzimeve, buxheti i alokuar nga burimet financiare ka qenë 7,099,162.97 euro, ndërsa realizimi i tyre ka arritur në 6,598,950.00 euro, që përfaqëson një shkallë ekzekutimi prej 92.95 për qind.

Në këtë mbledhje u shqyrtua gjithashtu propozim-vendimi për nisjen e procedurave për themelimin e një ndërmarrjeje publike lokale në komunë, si dhe propozimi për ndarjen e një parcele kadastrale të pronës komunale.

Po ashtu, në rend dite u përfshinë edhe dy pika shtesë që pritet të trajtohen në seancën e ardhshme të Kuvendit Komunal, propozim-vendimi për transformimin e mjeteve buxhetore në kuadër të programit buxhetor në kategorinë e investimeve kapitale, si dhe propozim-vendimi për kthimin e mjeteve në këtë kategori.

Gjatë diskutimeve, anëtarët e komitetit paraqitën vërejtje dhe sugjerime lidhur me çështjet e trajtuara, të cilat do të procedohen për shqyrtim dhe vendimmarrje në Kuvendin Komunal./rajonipress/