KPF në Viti miraton lista pronash dhe shqyrton marrëveshje ndërkombëtare

Viti – Komiteti për Politikë dhe Financa i Vitisë ka mbajtur mbledhjen e dytë të rregullt, në të cilën janë shqyrtuar dhe miratuar disa çështje me rëndësi për funksionimin dhe zhvillimin e komunës.

Gjatë takimit, anëtarët e komitetit kanë miratuar listën e veçantë të pronave të paluajtshme komunale që planifikohen të jepen në shfrytëzim gjatë vitit 2026, një hap që synon menaxhim më efikas dhe transparent të aseteve publike.

Po ashtu, është aprovuar formimi i një komisioni të posaçëm për vlerësimin e ofertave për dhënien në shfrytëzim të këtyre pronave, me qëllim garantimin e procedurave të rregullta dhe rritjen e transparencës institucionale.

Në këtë mbledhje është trajtuar edhe propozimi për marrëveshjen e binjakëzimit ndërmjet Komuna e Vitisë dhe Saint-Julien-en-Genevois, e cila pritet të hapë mundësi të reja bashkëpunimi ndërkombëtar në fusha të ndryshme.

Ndërkohë, në rendin e ditës janë përfshirë edhe dy pika shtesë: propozim-vendimi për ndërrimin e destinimit të një parcele me sipërfaqe prej 17,758 metra katrorë për ndërtimin e një çerdheje, si dhe deklarata mbështetëse e Kuvendit Komunal për eliminimin e të gjitha formave të dhunës ndaj grave në politikë dhe jetën publike.

Në përfundim, u bë e ditur se mbledhja e ardhshme e Kuvendit Komunal të Vitisë do të mbahet më 30 mars./rajonipress/