KPF në Artanë diskuton për projektet kapitale nga donatorët

Gjilan – Komiteti për Politikë e Financa (KPF) në takimin e saj të fundit ka aprovuar dhe shqyrtuar një varg pikash që lidhen me investimet dhe donatorët ndërkombëtarë. Raporti gjashtëmujor i Bajrush Ymerit është aprovuar derisa vet Ymeri ka thënë se Artana është në rrugë të mbarë që të përjetojë investimet serioze në fushën e turizmit, por edhe në infrastrukturë.

Anëtarët e Komitetit për Politikë dhe Financa në Artanë kanë diskutuar për disa pika që lidhen me investimet dhe projektet kapitale që parasheh kjo komunë për vitin 2013.

KPF ka aprovuar raportin e Bajrush Ymerit për gjashtëmujorin e dytë, dhe ka shqyrtuar raportin e Drejtorisë së Arsimit për përfundimin e gjysmëvjetorit të parë të vitit shkollor 2012/2013 dhe fillimin e gjysmëvjetorit të dytë. KPF ka shqyrtuar edhe raportin financiar për tremujorin e katërt të vitit fiskal 2012 si dhe ka diskutuar për propozim vendimin për projekte kapitale nga donatorët, me theks të veçantë ndërtimi i trotuarit në fshatin Pasjak në vlerë të 30.000,00 €, nga USAID-i. Një propozim tjetër është shqyrtuar edhe renovimi i shkollave vlera e projektit 39.000 € nga LOGOS-i Zviceran me participim nga Komuna prej 30 %. Të gjitha këto pika janë aprovuar për tu diskutuar në Asamblenë Komunale.

Bajrush Ymeri në raportin e tij po edhe në prononcimet e mëparshme ka thënë se prioritet për vitin 2013 do të kenë kërkesat e fshatrave të Artanës, si dhe mundësia për të investuar në Kalanë e Artanës dhe pikat që lidhen me turizmin e kësaj ane. “Unë kam mbajtur disa debate me qytetarë dhe tashmë i kam të qarta nevojat dhe kërkesat e tyre . Unë u jam mirënjohës qytetareve të Artanës që kanë qenë shumë modest në kërkesat e tyre .Ne tanimë kemi një listë me projekte kapitale ku së bashku shpresojmë që do t`i realizojmë për vitin 2013” tha ai.

Ymeri tha se këtë vit kanë ndarë mjete për herë të parë për të ndërtuar shtëpi për raste sociale, pra rreth 30 % të buxhetit e kemi nda për këtë kategori. “Subvencionet në bujqësi i kemi rritë këtë vit për 3 herë më shumë se vitin e kaluar. Kemi ndarë mjete për ndërtim të shkollës së mesme, për mirëmbajtje të rrugëve, për ambulanca, për kulturë, për asfaltime të rrugëve” etj.

Ymeri tha se sa i përket tatimit në pronë jemi shumë të kënaqur dhe po ashtu kemi arrit edhe rezultate të mira. “Për këtë flasin dy shpërblime që i kemi marrë nga USAID-i për grumbullimin e të hyrave vetanake” tha ai.

Ymeri tha se pret një kontribut të madh nga Qeveria e Kosovës , por edhe nga donatorët ndërkombëtarë si USAID-i, Logosi zviceran, programi DEMI, dhe disa organizata tjera të huaja që kanë shprehur interesimin e tyre për të investuar në njërin nga qytetet me një histori të lashtë kulture e historie siç është Kalaja e Artanës tha Ymeri./rajonipress/