KPF miratoi raportin financiar janar-qershor 2012

Gjilan – Komiteti për Politikë dhe Financa (KPF), në mbledhjen e së premtes, të parën për pjesën e dytë të këtij viti, të cilën e ka drejtuar kryesuesi Izmi Zeka, ka miratuar Raportin financiar janar-qershor 2012, të cilin e ka prezantuar drejtori për Buxhet dhe Financa, Nuhi Nuhiu.

Të hyrat komunale në këtë periudhë kohore janë realizuar në shkallën 88.27 për qind. Nga shuma e planifikuar prej 1.645.000 euro, janë arkëtuar 1.451.982 euro. Te shërbimet publike, plani i të hyrave është realizuar 198 për qind, te të hyrat nga qiraja – 136 për qind, të hyrat nga arsimi – 119 për qind dhe kështu me radhë.

Për Kuvend Komunal është rekomanduar edhe Raporti i Auditorit të Përgjithshëm për pasqyrat financiare të Komunës së Gjilanit për vitin 2011. Sipas Jakup Bajramit (LDK), në raport konstatohen shkelje të procedurave financiare, por kryetari i Komunës, Qemajl Mustafa ka thënë se në krahasim me komunat tjera të madhësisë së njëjtë, komuna e Gjilanit është dukshëm më mirë, duke nënvizuar se kjo komunë, me vite ka marrë notë pozitive sa u përket pasqyrave financiare.

KPF rekomandoi për Kuvend Komunal edhe Rregulloren mbi tatimin në pronën e paluajtshme për vitin tatimor 2013. Sadudin Berisha ka propozuar që vlera tatimore për metër katror të mbetet e njëjtë për të gjitha kategoritë. Ai ka thënë se nuk duhet të merret si kriter vlera e tregut, por vlera investuese, por drejtori Nuhi Nuhiu ka sqaruar se ligji për tatimin në pronë është miratuar tashmë dhe nuk lejon këso ndërhyrje.

Qemajl Mustafa, kryetar i Komunës, tha se ligji e përcakton si kriter vlerën e tregut, ndërkaq sa i përket tatimit në pronë, ai nënvizoi se në gjithë botën po pranohet ideja për lirimin e bizneseve nga tatimet dhe rritjen e tatimit në pronë, që konsiderohet taksa më e arsyeshme.

Me një votim formal, KPF i ka rekomanduar edhe tri propozim-vendime mbi qasjen në planet urbane te “Subqendra – Zhegër”, “Zabeli 1” dhe ish- “Popovica”, pjesa mbi tunel, njësoj sikurse edhe Planin e vlerësimit të rrezikut për komunën e Gjilanit, të cilin e ka prezantuar dhe arsyetuar Blerton Ajeti, drejtor për Mbrojtje dhe Shpëtim.

Sa i përket propozim-vendimit për komisionin komunal të aksionarëve në Ndërmarrjen Publike “Kosovatrans”, KPF ka rekomanduar që dy vende të plotësohen nga AKR dhe LDK, ndërsa tjetri, që është kryetar i këtij komisioni, do të caktohet nga PDK-ja dhe njësoj u veprua edhe te komisioni komunal i aksionarëve në PPP “Ecohigjiena”, për pjesën publike, ku pos anëtarëve të PDK-së e AKR-së, si partnerë të koalicionit, anëtari i tretë do të jetë nga opozita.

Pas një debati më të gjerë, KFP rekomandoi për Kuvend Komunal edhe propozim-vendimin për ndarjen e mjeteve financiare në emër të subvencionit për familjet e dëshmorëve Agim Ramadani dhe Avdullah Tahiri, të cilin e arsyetoi drejtori i Shëndetësisë dhe Mirëqenies Sociale, Xhemajl Salihu.

Anëtarët e KPF sugjeruan që familjet e dëshmorëve të trajtohen njësoj, kur është në pyetje ndarja e subvencioneve, sepse ata e kanë të njëjtin status. Vendimi i kryetarit të Komunës është se duhet të ndihmohen të gjitha familjet, ka thënë Salihu.

Propozim vendimi për subvencionimin e studentëve të Komunës së Gjilanit të cilët studiojnë jashtë vendit në nivelin master, u vendos që të kthehet për shqyrtim në Komitetin e Arsimit, pasi kishte dilema nëse Komuna mund të përballojë financiarisht kërkesat e tilla, ndërkaq u përkrah propozimi për anulimin e vendimit të datës 30.03.2009, për mbështetjen financiare të kandidatëve që përgatisin disertacionin e doktoraturës.

Për anulim u rekomandua edhe vendimi i datës 08.10.2002 që ka të bëjë me kompensimin e familjeve të shërbyesve civilë, sikurse edhe vendimi për marrjen me qira të hapësirave në KU “Gjilani”, pasi që, siç u tha, nuk është vërejtur vullneti te MASHT-i për të themeluar universitetin publik në Gjilan.

Edhe propozim vendimi për dhënien në shfrytëzim të pronës komunale për raste sociale, që u paraqit nga drejtori Gani Neziri, u rekomandua për Kuvend Komunal, i cili, siç u vendos në këtë takim të KPF, do të mblidhet në dy seanca të veçanta për këto rekomandime. /rajonipress/