KOSTT-i eliminon kompaninë që ofertoi çmimin më të lirë

Operatori i Sistemit, Transmisionit dhe Tregut e ka eliminuar konsorciumin “Ekoinvest & Kesir”, i cili kishte ofertuar me çmimin më të lirë në tenderin për “Furnizim dhe instalimin e TR3 në SS 110/10kV – Prishtina 2”.

Kompania e eliminuar kishte ofertuar një çmim prej 1 milion e 79 mijë eurosh. Kurse KOSTT-i e ka shpallur fitues të tenderit kompaninë “Monting”, që ishte e dyta për çmimin më të ulët, duke ofertuar me 1 milion e 92 mijë euro, shkruan Koha Ditore.

Konsorciumi “Ekoinvest & Kesir” është ankuar në Organin Shqyrtues të Prokurimit duke e akuzuar KOSTT-in se ka bërë shkelje të disa neneve të Ligjit të prokurimit kur e ka rekomanduar për kontratë kompaninë “Monting”. Të martën, në OSHP pritet të mbahet seanca për shqyrtim kryesor të ankesës së konsorciumit “Ekoinvest & Kesir”, i cili ishte shpallur i papërgjegjshëm nga KOSTT-i me arsyetimin se i mungojnë disa kërkesa që janë bërë në dosjen e tenderit.