Kosovën e pret kolaps financiar më 2015

​Kosovën e pret kolaps financiar, nëse vazhdon kriza institucionale deri në fund të vitit.

Mosfunksionimi i Kuvendit shkakton probleme në pagesa

Ngërçi politik është pengesë e madhe e zhvillimit ekonomik të vendit. Nëse kjo situatë vazhdon edhe më tutje, do të ketë telashe të mëdha buxhetore. Moskonstituimi i Kuvendit do të shkaktojë probleme në ekzekutimin e pagesave për vitin 2015. Njohës të çështjeve ekonomike janë të shqetësuar për këtë situatë, duke thënë se në rast se nuk miratohet buxheti i vitit 2015, do të ketë probleme të mëdha në realizimin e projekteve kapitale. Sa i përket ekzekutimit të buxhetit, sipas zyrtarëve të Ministrisë së Financave, nuk mund të paraqiten probleme, sepse baza ligjore ua mundëson që edhe pa rishikim të buxhetit të kryhen rregullimet e domosdoshme buxhetore.

“Ministria e Financave është duke punuar që të miratohet buxheti sipas Ligjit për menaxhimin e financave publike dhe përgjegjësitë, mirëpo nëse nuk konstituohen institucionet, atëherë sipas Ligjit për menaxhimin e financave publike dhe përgjegjësitë, do të shfrytëzohet neni 24 i LMFPP-së që merr për bazë vitin aktual dhe që siguron një ndarje buxhetore që është e barabartë me 8,33% (e vitit 2014)”, thuhet në përgjigjen e MF-së. Sipas tyre, me Kornizën Buxhetore për vitin 2015 është paraparë që buxheti të jetë 1,678 miliardë euro./Kosova Sot/