Kosova çdo vit me numër të njëjtë hotelesh

Me gjithë ndërtimet që janë bërë në dy vitet e fundit në Kosovë, numri i hoteleve të licencuara nuk ka ndryshuar aspak. Së paku, në shifrat që publikohen çdo tre muaj nga Agjencia e Statistikave që nga viti 2011 ai nuk ka lëvizur fare. Deri në tremujorin e parë të këtij viti numri ka mbetur në 170. Madje edhe teksti për këtë punë s’po ndërrohet fare.

“Duke u bazuar në të dhënat me të cilat posedon Ministria e Tregtisë dhe Industrisë (MTI) departamenti i Hotelerisë dhe Turizmit, si dhe Enti i Statistikave të Kosovës (ESK), del se në të gjitha komunat e Kosovës veprimtarinë hoteliere e ushtrojnë 170 hotele të licencuara”, thuhet në të gjitha publikimet tremujore të ASK-së të bëra nga viti 2011.

Kurse, dallimi në numër që nga viti 2010 e deri më tani është vetëm në 7 hotele. Sipas ASK-së, në vitin 2010 kanë qenë 163 hotele të licencuara. Mirëpo, për krejt këto shifra dhe tekst të përsëritura në Agjencinë e Statistikave thonë se fajtorë është dikush tjetër. Ata thonë se krejt të dhënat i marrin nga Ministria e Tregtisë dhe Industrisë… (Tribuna).