Kontrolle në Kabash të Vitisë, arrestohet një person dhe sekuestrohet armë automatike e municion

Gjilan – Njësiti i Hetimeve të Përgjithshme në kuadër të Drejtorisë Rajonale të Policisë në Gjilan, në bashkëpunim me autoritetet gjyqësore dhe në zbatim të urdhëresës së Gjykatës Themelore, ka realizuar kontroll në shtëpinë dhe objektet përcjellëse të një personi të dyshuar në fshatin Kabash të Komunës së Vitisë.

Sipas Policisë, kontrolli është kryer nën dyshimin për veprën penale “Mbajtja në pronësi, kontroll ose posedim të paautorizuar të armëve”.

Gjatë kontrollit, zyrtarët policorë kanë gjetur dhe sekuestruar në cilësi të provave materiale një armë të gjatë automatike të llojit AK-47, dy karikatorë të kësaj arme me 47 fishekë të kalibrit 7.62×39 mm, si dhe municion të llojeve dhe kalibrave të ndryshëm.

Në mesin e sendeve të sekuestruara janë edhe 41 fishekë të kalibrit 9×19 mm, 24 fishekë të kalibrit 7.62×39 mm dhe tre fishekë të kalibrit 7.65×17 mm, ndërsa policia ka sekuestruar gjithashtu një palë dylbi, tre boksa metalikë, një palë pranga, një çelës për pranga dhe një brisk.

I dyshuari është intervistuar nga autoritetet, ndërsa me vendim të Prokurorit të Shtetit është dërguar në mbajtje për 48 orë.

Rasti po trajtohet nga organet kompetente, ndërsa provat e sekuestruara do t’i nënshtrohen procedurave të mëtejshme ligjore./rajonipress/