Kontrabandë në Hodonovc, arrestohet i dyshuari, sekuestrohen mallra mbi 5 mijë euro

Kamenicë – Një person është arrestuar nën dyshimin për kontrabandim me mallra, pas një operacioni të zhvilluar nga Policia e Kosovës në kuadër të Planit Operativ “Gatishmëria Vepruese 2026”.

Rasti është evidentuar më 22 prill 2026 në fshatin Hodonovc, ku njësitet e Policisë Kufitare, pas sigurimit të informatave operative dhe monitorimit përmes mjeteve të vëzhgimit, kanë identifikuar një aktivitet të dyshimtë.

Sipas policisë, është ndaluar një mjet bujqësor (traktor), i cili dyshohet se kishte hyrë ilegalisht nga territori i Serbisë në Republikën e Kosovës. Pas ndalimit, në cilësinë e të dyshuarit është intervistuar drejtuesi i mjetit, personi me inicialet L.H. (1968).

Gjatë kontrollit të mjetit janë gjetur dhe sekuestruar mallra të ndryshme, kryesisht pjesë për mjete bujqësore, me vlerë që tejkalon 5 mijë euro.

Të gjitha veprimet janë ndërmarrë në koordinim me prokurorin kompetent, ndërsa rasti po vazhdon të hetohet nga njësitet përkatëse të Policisë Kufitare.

Policia e Kosovës ka theksuar se mbetet e angazhuar në luftimin e kontrabandës dhe aktiviteteve ilegale, me synim ruajtjen e rendit dhe sigurisë në vend njoftoi policia e Kosovës./rajonipress/