Komuniteti i Hajvalisë në mbështetje të Behgjet Pacollit: E vërteta të zbardhet, drejtësia të veprojë pa ndikime politike

Behgjet Pacolli është një nga njerëzit që e ka bërë emrin e Kosovës të njohur në botë përmes punës, sipërmarrjes dhe investimeve të tij. Pavarësisht bindjeve politike, askush nuk mund ta mohojë kontributin e tij ndër vite për Kosovën dhe shqiptarët.

Kur një investitor pretendon se është përballur me padrejtësi dhe kërkon një hetim të plotë nga institucionet e drejtësisë, përgjigjja duhet të jetë transparenca, ligji dhe e vërteta – jo paragjykimi dhe gjykimi paraprak.

Nëse ka pasur shkelje, ato duhet të hetohen deri në fund dhe secili duhet të mbajë përgjegjësi. Nëse jo, atëherë edhe emri, dinjiteti dhe reputacioni i atyre që janë dëmtuar duhet të rehabilitohen.

Hajvalia ka qenë dhe mbetet krenare për njerëzit e saj. Behgjet Pacolli është pjesë e këtij komuniteti dhe suksesi i tij ka qenë gjithmonë edhe krenari për vendin tonë.

Sot, si bashkëvendës, urojmë që e vërteta të dalë sa më shpejt në dritë, ndërsa drejtësia të bëjë punën e saj me profesionalizëm, pa ndikime dhe pa standarde të dyfishta.