Komuna mbulon shpenzimet e varrimit

Gjilan -Tash e tutje, Komuna merr obligim për shërbimet e varrimit në tërë territorin e saj, duke i mbuluar të gjitha shpenzimet e parapa tha Shefik Surdulli.

Komuna e Gjilanit, me iniciativa dhe veprime konkrete po dëshmon se është pranë qytetarit, duke i shërbyer atij edhe në rastet e pikëllimit.

Në kuadër të një vendimi që ka marrë Kuvendi i Komunës për shërbimet e varrimit, në tërë territorin e Komunës së Gjilanit, me procedura ligjore të prokurimit, tani më është përzgjedhur edhe kompania e cila do të merret me këto shërbime.

Pra, familjari i të vdekurit, përveç dhembjes dhe pikëllimit për humbjen e të afërmit të tij, ai më nuk e ka barrën e organizimit të varrimit në aspektin teknik dhe poashtu për shpenzimet e shërbimit të varrimit, sepse komuna e tij tash e tutje, arsyeshëm e ka zgjidhur këtë problem ka thënë Shefik Surdulli.

Vetëm përmes një telefonate, me të cilën familjari i të vdekurit e njofton kompaninë kontraktuese për shërbimin e varrimit, duke ia dhënë asaj të gjitha shënimet e nevojshme për rastin, ai e ka krye obligimin e tij qytetar. Kompania pastaj, sipas kontratës me Komunën, është ajo që obligohet ti kryej të gjitha shërbimet deri në përfundimin e varrimit.

Në shërbime të varrimit, sipas kontratës, hyjnë: konstatimi vdekjes së personit duke përfshirë edhe certifikatën mjekësore; lajmërimet – shpalljet për vdekjen; hapja e varrit, dërrasat dhe mbyllja; pastrimi i kufomës nga personi përgjegjës dhe përgatitja e kufomës sipas parimeve fetare për falje; shërbimi i imamit për faljen e namazit; transporti i kufomës nga shtëpia deri te xhamia dhe përcjellja deri në varrezë; dërrasat dhe mbyllja e varrit sipas parimeve fetare; piramida me mbishkrimin për të vdekurin, dhe në raste të vdekjes së personit jashtë shtetit apo në spitalin e Prishtinë, kryhet edhe shërbimi i transportit të kufomës nga aeroporti ndërkombëtar i Prishtinës përkatësisht spitali i Prishtinës, deri në komunën e Gjilanit.

Sipas paramasës dhe parallogarisë, i gjithë shërbimi i varrimit për një të vdekur, kushton 240 euro, shpenzime këto që i mbulon tërësisht komuna ka sqaruar Surdulli.

Prandaj, familjarët që kanë rast vdekje, nuk kanë nevojë të bëjnë shpenzime shtesë apo të dyfishta sa i përket shërbimit të varrimit, sepse këtë obligim e ka marrë Komuna dhe tërë procesin e shërbimeve të varrimit e mbikëqyrë drejtoria komunale për Shërbime Publike në Gjilan.

Përveç një akti human ndaj qytetarëve tanë, për një pjesë të konsiderueshme të familjeve tona, këtë shërbim e konsiderojmë edhe si një lehtësim ekonomik-social tha Surdulli./rajonipress/