Komuna largon barakat e vendosura dhunshëm në hapësirat publike

Gjilan – Gorolub Paviq kishte instaluar para luftës një barakë në hapësirat e kopshtit të bibliotekës së qytetit. Veton Nevzadi tha se jemi të përkushtuar që t`i realizojmë vendimet e Asamblesë Komunale.

Një barakë e vendosur në kopshtin e bibliotekës ë qytetit tashmë është zhvendosur nga inspeksioni komunal. Edhe një tjetër kioskë që është pronë e lotarisë së Kosovës pritet të zhvendoset për ta liruar hapësirën e bibliotekës së qytetit.

Baraka e cila ishte vendosur para luftës është pronë e Gorolub Paviqit. “Kontestin gjyqësor e ka humbur më herët, por janë procedurat tjera që e kanë vonuar këtë zbatim të vendimeve të asamblesë komunale” tha Veton Nevzadi.

Nevzadi tha se janë të përkushtuar që të lirojnë të gjitha hapësirat e uzurpuara e që janë pjesë e komunës. “Ligji do të zbatohet njësoj për të gjithë dhe ne presim shpejt që edhe lotaria e Kosovës ta zhvendos atë kioskë” tha drejtori i kulturës.

Edhe Shefki Osmani drejtor i bibliotekës rajonale “Fan. S. Noli” tha se këto objekte montazh e kanë penguar bukur shumë edhe qarkullimin e lexuesve. “Tani shpresojmë se do të bëhet një kopsht i mrekullueshëm pasiqë ka hapësirë të mjaftueshme” tha Osmani.

Ndryshe aksioni për heqjen e barakës është mundësuar nga inspeksioni komunal dhe policia. Valon Shefkiu udhëheqës në inspeksion tha se nuk kanë pasur telashe me përjashtim të rrymës./rajonipress/