Komuna e Vitisë rritë shkallën e inkasimit të të hyrave

Viti – Në mbledhjen e sotme të Këshillit të Drejtorëve është diskutuar rreth pasqyrave financiare të buxhetit komunal për periudhën Janar-Shator 2014 si dhe rreth propozim vendimit për emërimin e rrugëve nëpër fshatrat e Komunës së Vitisë. Gjatë shqyrtimit të pasqyrave financiare është dhënë se Komuna e Vitisë gjatë kësaj periudhe deri me tani ka shpenzuar 5.988.192,01€ nga gjithsej 9.203.850,72€ të cilat janë të aprovuar për vitin 2014. Gjithashtu duke bërë krahasimin e të hyrave për të njëjtën periudhë të këtij viti me vitin 2013 del se Qeveria e tanishme Komunale e Vitisë ka realizuar 90.930,09 € më shumë sesa në vitin paraprak.

Drejtori për Ekonomi, Financa dhe Zhvillim Ibrahim Rama duke paraqitur pasqyrat financiare të buxhetit komunal për periudhën Janar-Shator 2014 për të gjitha kategoritë ekonomike theksoj se gjatë kësaj periudhe janë shpenzuar 5.988.192,01€.“Ekzekutimi i shpenzimeve të buxhetit komunal për periudhën Janar-Shator të këtij viti është duke u realizuar sipas planit dinamik, për këtë periudhë kemi shpenzuar 5.988.192,01€ ose 76.33%.

Ndërkaq në kategoritë e tjera janë shpenzuar për paga dhe mëditje 75.34%,kapitale 13.71%, subvencione 1.26%, Komunali 2.06% si dhe mallra dhe shërbime 7.63%.” tha drejtori Rama.

Ai mandej i bëri të ditur edhe shpenzimet e tjera nëpër drejtorit dhe sektorët e Komunës së Vitisë.

Ndërkaq duke folur rreth shpenzimeve në realizimin e investimeve kapitale ai theksoi se kjo komunë është e përkushtuar që për muajt të mbetur të bënë realizimin e 100% të buxhetit.

Rama ka përmendur ndër tjerash edhe shkallën e realizimit të të hyrave për këtë periudhë dhe atë duke e krahasuar me të njëjtën periudhë të vitit të kaluar e nga kjo del se Qeveria e tanishme Komunale e Vitisë ka realizuar 90.930,09 € më shumë sesa në vitin paraprak.

Ndërkaq zv. Kryetari i Komunës së Vitisë Hasan Aliu theksoi se përkundër rritjes së shkallës së inkasimit të hyrave kjo qeveri është e përkushtuar që të rrisë edhe më shumë shkallën e inkasimit si dhe të zvogëloj shpenzimet. “Ju sugjeroj që të bëni analizat e nevojshme që të shtojmë edhe më tutje intensitetin e punës në vjeljen e taksave aty ku është e mundur” u shpreh Aliu.

Ndërkaq gjatë këtij takimi është paraqitur edhe propozim vendimi për emërimin e rrugëve nëpër fshatrat e Komunës së Vitisë e që kjo punë është bërë nga komisioni përkatës në bashkëpunim me këshillat e fshatrave të kësaj komune me mekanizmat e tjera./rajonipress/