Komuna e Kamenicës shënon Ditën Botërore të Autizmit me aktivitete të ndryshme

Kamenicë – Koordinatorja e Njësisë Komunale për të Drejtat e Njeriut pranë Drejtorisë së Administratës së Përgjithshme, Nazmije Demolli-Kastrati, në bashkëpunim me Drejtoreshën e Organizatës Handikos, Hyrmete Morina dhe asistenten e kësaj organizate Shejnaze Fazliu, dhe organizatën KEC, në kuadër të Ditës Botërore të Autizmit, kanë organizuar një ekskursion njëditor me fëmijë me nevoja të veçanta bashkë me nënat dhe mësueset e fëmijëve në klasët e bashkangjitura.

Ata në kuadër të këtij ekskursioni vizituan Qendrën Rehabilituese të Handikosit në Drenas, ku u pritën nga drejtori i kësaj qendre Behxhet Binaku me stafin e tij.

Koordinatorja Nazmije Demolli-Kastrati ka thënë se qëllomi i kësaj vizite ishte për të parë për së afërmi punën dhe përvojat e tyre lidhur me ofrimin e shërbimeve.
“Ishte për t’u admiruar stafi i kësaj qendre ku kishte psikolog, logoped, asistent, fizioterapeut dhe staf mbështetës për personat me nevoja të veçanta”, ka thënë ajo.

Në anën tjetër drejtori i kësaj qendre, Behxhet Binaku, ka falënderuar për këtë vizitë nga Kamenica, madje përgëzoi edhe bashkëpunimin mes dy komunave, përkatësisht Njësisë Komunale për të Drejtat e Njeriut dhe Handikosit në Kamenicë.

Ekskursioni më pas ka vazhduar edhe me vizitën në Kompleksin Memorial “Adem Jashari” në Prekaz, ku pjesëmarrësit u ndanë shumë të kënaqur për këto vizita.

Ndërsa dita e sotme vazhdoi me vizitën në disa shkolla të komunës ku psikologët e pedagogët kishin organizuar aktivitete të ndryshme lidhur me shënimin e kësaj dite, dhe Koordinatorja e NJKDNJ-së, Nazmije Demolli-Kastrati ka shpërndarë fletëpalosje me informacione sa i përket Autizmit tek nxënësit në shkolla si dhe tek qytetarët.

Shpërndarja e këtyre fletushkave me informacione, sipas Koordinatores Demolli-Kastrati synon të rrisë ndërgjegjësimin e qytetarëve lidhur me çrregullimet e spektrit të autizmit dhe përmirësimin e jetës së atyre që jetojnë me autizëm.

Komuna dhe Njësia komunale për të drejtat e njeriut falënderon Agjencionin Turistik “Përparimi” me drejtor Mentor Kryeziun, i cili mundësoi transportin gratis për realizimin e ekskursionit, gjithashtu edhe Qendrën për Arsim të Kosovës KEC me përfaqësues Rexhep Arifi për mbështetjen (ushqim dhe pije për pjesëmarrësit) që i dha këtij organizimi, dhe gjithë akterët tjerë që mbështesin aktivitetet e NJKDNJ-së./rajonipress/

Shpërndaje.
© RAJONIPRESS