Komuna e Kamenicës me shërbime të veçanta për mërgimtarët, aktivizohen linjat e gjelbra dhe rezervohen vende parkimi

Kamenicë – Në kuadër të përkushtimit për t’u ofruar shërbime sa më efikase bashkatdhetarëve gjatë sezonit të verës, Komuna e Kamenicës ka ndërmarrë masa të reja për të lehtësuar qasjen në administratën komunale.

Drejtoria e Administratës ka vënë në funksion dy linja të gjelbra, të dedikuara ekskluzivisht për bashkatdhetarët, duke u mundësuar atyre që gjatë qëndrimit në vendlindje t’i kryejnë procedurat administrative më shpejt, pa pritje të gjata dhe me efikasitet më të madh.

Përveç kësaj, pranë objektit të Komunës janë rezervuar edhe dy vende parkimi për mërgimtarët, me qëllim që t’u lehtësohet qasja në institucion dhe kryerja e obligimeve administrative.

Nga Komuna e Kamenicës bëjnë të ditur se këto masa janë pjesë e angazhimit të vazhdueshëm për t’i ofruar diasporës shërbime më cilësore dhe më të qasshme, duke e bërë qëndrimin e tyre në vendlindje sa më praktik dhe të lehtë./rajonipress/