Komuna e Kamenicës forcon bashkëpunimin me Peace Corps, fokus te angazhimi i vullnetarëve amerikanë

Kamenicë – Nënkryetarja e Komunës së Kamenicës, Arta Bajralija, së bashku me zëdhënësen komunale Lidiona Marovca, kanë pritur në takim drejtoreshën e misionit të Peace Corps për Kosovë, Joanne Fairley, me bashkëpunëtorë.

Gjatë këtij takimi u diskutua për bashkëpunimin ndërinstitucional ndërmjet Komunës së Kamenicës dhe Peace Corps, i cili tashmë ka një traditë mbi 12-vjeçare. Palët vlerësuan bashkëpunimin e deritanishëm, si dhe rolin e rëndësishëm të vullnetarëve amerikanë që jetojnë dhe kontribuojnë në këtë komunë.

Nënkryetarja Bajralija shprehu mirënjohje për mbështetjen e vazhdueshme të Peace Corps dhe theksoi përkushtimin e komunës për të ofruar kushte sa më të mira për vullnetarët. Ajo gjithashtu nënvizoi rëndësinë e vazhdimësisë së këtij bashkëpunimi, me synim rritjen e përfshirjes së vullnetarëve në jetën institucionale dhe komunitare.

Ky takim konfirmon angazhimin e ndërsjellë për thellimin e bashkëpunimit dhe për forcimin e lidhjeve ndërmjet institucioneve vendore dhe partnerëve ndërkombëtarë në shërbim të zhvillimit lokal./rajonipress/