Komuna e Gjilanit vazhdon dëgjimet buxhetore, qytetarët paraqesin prioritetet për Buxhetin 2027–2029

Gjilan – Komuna e Gjilanit ka vazhduar procesin e dëgjimeve buxhetore me qytetarët, kësaj radhe në SHFMU “Abaz Ajeti”, ku banorët e lagjeve Arbëria dhe Zabeli, si dhe të fshatrave Velekincë, Lipovicë, Burincë dhe Muqibabë, kanë paraqitur kërkesat dhe prioritetet e tyre për hartimin e Buxhetit Komunal 2027–2029.

Takimi u drejtua nga kryesuesja e Kuvendit Komunal, Krenare Latifi Kqiku, ndërsa morën pjesë edhe drejtori i Shërbimeve Publike, Kushtrim Ibrahimi, drejtoresha e Shëndetësisë, Mimoza Kadriu Qerimi, dhe drejtori për Buxhet dhe Financa, Avdyl Kastrati. Të pranishëm ishin gjithashtu këshilltarët komunalë Shefket Kqiku, Liresa Ibrahimi, Gentrit Murseli dhe Fadil Ademi.

Gjatë diskutimeve, qytetarët shprehën shqetësimet, kërkesat dhe nevojat e tyre për investime në infrastrukturë, shërbime publike dhe fusha të tjera me interes lokal. Përfaqësuesit komunalë theksuan se të gjitha propozimet e paraqitura do të shqyrtohen dhe do të merren në konsideratë gjatë përgatitjes së Buxhetit të Komunës së Gjilanit për periudhën 2027–2029.

Komentuesit kritikojnë Kadri Rahimajn për asfaltimin e rrugës në Desivojcë: “Po bëhet kur fshatrat janë zbrazur”

Kamenicë – Postimi i kryetarit të Komunës së Kamenicës, Kadri Rahimaj, për asfaltimin e rrugës në fshatin Desivojcë ka nxitur reagime të shumta në rrjetet sociale, ku disa qytetarë kanë shprehur kritika për kohën e realizimit të investimit dhe prioritetet infrastrukturore të komunës.

Komentuesi Arbër Demolli ka rikujtuar një problem tjetër infrastrukturor, duke shkruar se ura në fshatin Hajnovc, e cila lidh rrugën Kamenicë–Prishtinë, nuk është rregulluar tash e pesë vjet. Ndërkaq, Flamur Kastrati ka vënë në pikëpyetje rëndësinë e investimit në Desivojcë, duke komentuar se rruga po asfaltohet në një zonë me shumë pak banorë.

Edhe Milaim Kqiku ka shprehur zhgënjimin e tij, duke theksuar se asfalti po vjen vetëm pasi, sipas tij, fshati është zbrazur, shkollat janë mbyllur, pyjet janë dëmtuar dhe toka bujqësore është lënë pas dore. Ai ka theksuar se nuk fajëson individë të caktuar, por mungesën e kujdesit dhe angazhimit ndër vite.

Komentet pasqyrojnë pakënaqësinë e një pjese të qytetarëve, të cilët vlerësojnë se investimet infrastrukturore në zonat rurale po realizohen me vonesë, në një kohë kur shumë prej këtyre vendbanimeve janë përballur me emigrim dhe rënie të numrit të banorëve./rajonipress/